الواضح من صاحبة هذه الصوره انها ضايعه بالطوشه !
بحيث يوجد عدد كبير من المسارات في حياتها ويصعب عليها تحديد ماهية هذه المسارات
ويلاحظ ايضا انها تعتمد على الاخرين في اتخاذ القرارات لاسيما
ان فيه خط اصفر كان ملفلف ومسوي زي حرف S < ويعني طريق متعرج !
وهذا يدل على انه فيه احد من الخارج يتدخل في شؤونها الخاصه وناشب لها نشبه
عموماً كثرة الخطوط العشوائيه تدل على ان صاحبة الصوره تعاني من اضطراب ماقبل الامتحانات
ربما اننا لسى بأول الترم ومابعد جت الاختبارات , لكن وش نسوي بصاحبة الصوره فهي دافوره من الحين مضطربه



.. نصيحتنا لصاحبة الصوره ..

ازهليها بس ودعك من نصائح الوالدين واللي براسك سويه
وليكن شعارك الجديد " مالكم دخل "


















 

 

صاحبة هذه الصوره يظهر عليها التناقض و عدم المصداقيه ونخشى عليها من بدايات قهريه
يعني هي تبي تعلمنا انها تعاني من الكبت ( راجع شكل الفم وكيف انه مشطب)
وتبي تقول لنا ان الرؤيه ضبابيه بالنسبه لها ( راجع شكل العيون اللي مشخبط عليها )
وتعمدت وضع استفهامات بحيث توحي للي حولها من مشرفين واعضاء ,انها غافله عنهم وانها مهيب لمهم
ولكن العكس صحيح , هي جداً فاهمه وش القصه وتراقب الجميع حتى وهي نايمه
وجود المربعات بشكل دقيق يدل على الحذر الشديد والتوتر ومحدودية التعامل مع الاخرين
استخدامها للألوان هذي بالذات يدل على قوه ووضوح وغموض < شلون تجي بس عاد حلوها انتم
بالنسبه للمفتاح الموجود في يسار الصوره فهذا مفتاح قديم ضاع يو تغرق التايتانك واللي يلقاه له جائزه
الزبده الصوره هذي فيها كم من الايحاءات المقصوده , هاهاها يعني تبي تلعب علينا حنا نبي شي من اللاشعور
مانبي شي متقاط فيه جميع اطراف المخ الصاحي


.. نصيحتنا لصاحبة الصوره ..

كوني على طبيعتك , والقرار اللي انتي متردده تتخذينه استخيري وتوكلي على الله !









 

 

صاحب هذه الصوره انسان يعاني من الاختناق ويحس انه تقل مسجون ويعاني من فقدان هويه مزمن
وهو بحاجه ماسه الى من يحتضنه ويرعى مواهبه اللي يحس انه مااحد مقدرها
مشاعره الداخليه من الصعب جداً اظهارها للأخرين كما هي
يعاني من شعور رهيب بعدم الحريه , يحس انه وده يهاجر لوطنه القديم
ولا سيما انه اختار الوان فاقعه ترمز لعرقه الاصلي
وهذا يدل على ان حتى طرش عنده دم ويحن لديرته بعد
كثرة الانحناءات في الاشكال يدل على طيبة القلب التي دائماً تسبب له المشاكل وان الاخرين يثقلون كاهله بكثرة الطلبات
لاحظوا معي ان الاشكال كانت صغيره في البدايه وبعدين كل مانتجه لليمين تكبر شيئاً فشيئاً
وهذا يدل على تطلعه للمستقبل ومحاولته للعيش بطريقه جميله ورغبته للزواج بفتاة شاميه


.. نصيحتنا لصاحب هذه الصوره ..

حاول التخفيف قدر الامكان من استخدام الالوان الصارخه واستعمل الواناً اكثر دفئً وشاعريه < عشان تغري السوريات
بالنسبه للأفكار السلبيه التي تجول بخاطرك اقتلها وانطلق للعيش بكل راحه واستهبال
ترى الدنيا فانيه !






 

 

سبحان الله , صاحبة هذه الصوره استطاعت ان ترسم مخها بشكل رهيب
الدوائر تدل على انها كريمه ومتعاونه ولكن اذا عصبت هجوا عنها
تميل دائماً الى اللون الازرق , وبحكم انها كتومه فإنها دائما تعاني من مشكله اسرار الصديقات
فكل واحده تتصل عليها وتجلس ترغي وتقول لها تكفين لاتعلمين احد !
الدوائر الصغيره تمثل اسرار قديمه ومندثره ولكنها مازالت مضيقتن صدر صاحبة الصوره
طبعاً فيه اسرار بريئه وهذا ماتمثله الدوائر البيضاء
وفيه اسرار خطيييره وهذا ماتمثله الدائره الحمراء , وفيه اسرار معقده ولم تجد الحل وهذا ماتمثله الدوائر اللي عليها شخابيط !
طبعا فيه بعض الاسرار تخزنت في العقل الباطن وهذا مايجعل صاحبة الصوره تفكر بالانتحار كل مااتصلت احد صديقاتها
لأنها تحس برغبه عارمه بالتحدث و الصراخ عن مايجول في خاطرها




.. نصيحتنا لصاحبة الصوره ..

قدرة التحمل لديك شديده وقويه , وننصحك للألتحاق بالحرس الوطني للتسجيل ببرنامج كيف تكتم اسرار الحكومه
لأنك المرأه الوحيده اللي قدرت تحفظ سر اكثر من يومين !








 

صاحب هذه الصوره يعيش فتره ركود وانغلاق وتقوقع !
رسمه لبؤبؤ العين والذي يتجه لليمين يدل على انه يميل للماضي ويفكر فيه , يعني فيه شي بماضيه
مقلق راحته ومو قادر ينساه , استخدامه للالوان القاتمه يدل انه يعاني من غلقه وتكّه في خاطره
زي ماقلنا المربعات تدل على المحدوديه في التعامل مع الاخرين والحذر
طريقه رسمه لأربع مربعات ووضعها في اتجاهات متقابله
يعني ان صاحب الصوره لديه القدره على التركيز ووضع الامور في نصابها مهما ساءت الظروف
وهذا ان دل على شيئ فأنه يدل على انه من النوع الدقيق اللي مايفوته شي
اما بالنسبه لحرف الـ X اللي رسمه على المربع الاصفر
يدل على انه سريع اثناء الكتابه وغالباً مايضغط على القلم بشده
ويدل ايضاًعلى انه شخص تنافسي ودائماً مايلعب لأجل الفوز
(وجه يقول وراك ماتلعب مع النصر يمكن ينفع فيهم )




.. نصيحتنا لصاحب الصوره ..

انت اعترف سامي احسن لاعب بالعالم وهمومك كلها سوف تزول









 

 

صاحب هذه الصوره .. غريب عجيب !
شويه ان قلت انه حالم ولا خيالي !!
اصلا شويه ان قلت انه مهب سعودي خخخخ اجل سفينه فوشيه !!
صاحب هذه الصوره انسان يعيش فترات نكوص غير طبيعيه .. و يحن ّ للطفوله وايامها البريئه
واضح انه انسان اجتماعي , ودود , حساس , متفتح , معبر , يحب الهدوء
يميل الى الدفاع عن الاخرين ولديه رغبه في اثبات نفسه
وباين انه مرتب جداً , ولا يحب الحوسه واللجه والصجه
غالباً ما يظهر عليه البرود والتطنيش , يعني لاتتصادم مع اي شخص برجه عقرب وقسم بالله مايردك الا الشميسي
الزبده ان صاحب هالصوره انسان متصالح مع نفسه واخر همه العالم
يعني لو تنفجر جنبه قنبله لاتتوقعون يخاف ولا يرتعب
لأنه من البرود مو مستوعب ان القنبله انفجرت الا بعد اسبوع



.. نصيحتنا لصاحب هذه الصوره ..

من جدك انت كذا ولا تستهبل ؟
يعني صدق مرتب ومنمق ورايق ولا تمزح علينا
( معليش الدكتور الالماني مره متوهق مع صاحب هذه الصوره يقول ابيه هو ينصحني )









 

كل شي في هذه الصوره يدل على الحزن .. سواء الالوان او طريقه تعرج الخطوط !
رسم الشمس وهي بحالة غروب هذا يدل على انه يعاني من الكآبه
واضح انه شخص يحب السفر والترحال والتطلع للأمام ولكن مهب حاصل له
يمكن عنده دراسه ولا المدير حقه مسوي له قلق , والدليل انه راسم السفينه ولكن طالع منها
هذاك الشي اللي يثبتها ويخليها ماتتحرك
عموما هو شخص عنده روح المغامره ومتفتح
كتابته لأسمه بالطريقه هذي يدل على انه يحب نفسه ولايفضل ان يكشف بعض الاشياء الخاصه فيه
ولاحظوا معي ثلاث اجزاء رئيسيه بالصوره هذي
الشمس , السفينه , النخله
الشمس والسفينه يدلون على انه شخص منطلق , متحرر ويبي يسافر ويصير على كيف كيفه
اما النخله تدل على شيئ موجود في البيئه السعوديه وتمثل له عائق يمنعه من الدجه
عموما صاحب هذه الصوره غير سعيد
وايضاً الشي اللي بالسعوديه ومسوي لك عائق هو ايضاً غير سعيد ( لاحظ النخله مايله وشكلها تعبانه )
للدرجه هذي المدير يحبك ومايقدر يستغني عنك



.. نصيحتنا لصاحب هذه الصوره ..

تبي تسافر بدون ماحد يصجك !
بلا سفينه بلا قبطان ..
باور هورس يعطيك جواااانيح











 

الاشكال في اسفل الصوره توحي بأنه شخص تحاول ان تكون
صبور ومثابر ولكن ينقصك التركيز!
وايضاً انت متفائل , وتسعى للتقدم للأمام , وذو شخصية دبلوماسيه
لكن الان او وقت رسم الصوره كان فيه توتر في شخصيتك
وكأنك تحس ان عندك وقت فراغ كبير وماتعرف وش تسوي فيه !
بسيطه ياخي احفظ سوره الكهف مادام الفراغ مضيق صدرك
رسمك للسكين بهذا المنظر وبالمكان هذا بالذات يدل على انك تسعى للتنافس على شيء ما
قد يكون هذا الشي صعب المنال ولكنك تريد الحصول عليه مهما كلفك الثمن
اتجاه رأس السكين لليمن يدل على انك اذا حصلت على مبتغاك
فأنك ناوي تقهر شخص كان منكد عليك من قبل !
ياربيه للدرجه هذي حاقد
الشكل الاسود اللي بوسط الصوره .. يدل على انك عصبي
وتحب تسيطر وتستقل برأيك !



.. نصيحتنا لصاحب الصوره ..


ابلع العافيه واحمد ربك على نعمته ,
وخلاص لاعاد تشترك بأي مسابقه بالأقلاع لأن فريقك دايم يفوز وماتعطي الباقين مجال
ترى العالم بيكرهونك