- يالله .. ماتملين انتي 24 ساعه تتفرجين افلام الكرتون ؟! وش خليتي للبزران ..
- وش افلام كرتون وش بزرانه .. صدق لا قالو قراوه .. هذي ياماما اسمها انمي ..
- واذا يعني اختلفت المسميات والمضمون واحد ..!
- لا ياعمري هذا فن بحد ذاته وش عرفك .. وفيه فرق بينها وبين افلام الكرتون اللي مخصصه فعلا (( للبزران )) .. لكن الانمي غير .. مثله مثل اي فن ثاني .. واغلبه موجه للفئه العمريه اللي اكبر من 18 سنه ..
- بدينا بالفلسفه اللي ما لها سنع ... بالنسبه لي ما فرقت كلها نفس الشي .. فارقي عني ..
- طيب وش رايك نسوي تحدي بيني وبينك ؟
ابعطيك حلقه من مسلسل وشوفي اذا يعجبك والا لا ؟ واذا هو للبزران والا لا؟
- أممممممممم .. طيب بس إذا ما عجبني أعتبر أنا الفايزه .. اووكي ؟ !!
- اوكي ..
- أصبري .. إذا فزت عليك أطلب منك اللي أبي ..
- أووكي .. وإذا أنا فزت عليك أبيك تنزلين تقرير كامل عن الأنمي اللي تشوفينه وش رايك ..
- أتفقنا ومن الحين أستعدي للخساره ..

هالموقف صار بيني وبين أختي -- فعلا كنت لما أشوفها تتابع الأنمي أضحك عليها أقول وش فيها عاشت طفوله متأخره لكن لما نفذت التحدي اللي بيني وبينها تغيرت كل نظرتي للأنمي
جد كلنا ماخذين فكره غلط عنه -- هو يعتبر عالم ثاااني وكبيـــــــــــــــر مثله مثل الأفلام الأمريكيه مثل المسلسلات العربيه اللي نشوفها ونتابعها -- بالنسبه لي أشوفها أحلى وأمتع وشي جديد بالنسبه لي ..
خصوصاً إن الأنمي يتكلم في قضايا الشباب أكثر بينما باقي المسلسلات كلها تلاقي واحد تزوج على زوجته وواحد يبي فلوس أبوه وقاط أمه بالشارع !! وإن سووا لك كوميديا تمسخروا على العالم وأنواع الذب ! بينما الأنمي يتكلم عننا احنا بشكل عام ،،
مشاكلنا \ حركاتنا \ استعباطنا \ تفكيرنا وحتى أحلامنا البسيطة ..
وطبعاً دامي خسرت بالتحدي وراحت علي كان لازم أسوي التقرير اللي لقيته جداً ممتع
شرايكم ناخذ فكرة عن ثقافة الأنمي ؟؟

يالله نبدا أول شي تعريف الأنمي << هههههههه عاشت جو الأخت أنها مدرسه ..





 

Anime
ah-nee-meh

أه - ني- مي
الأنمي فن قديم بالحيل بالحيل -- طلع على الدنيا قبل لا أنا أطلع عليها << ياشيـــــــــــــــخه !!
بداياته كانت أيام الخمسينات وتطور بسرعة خرافية إلى ماوصل للي احنا فيه الحين،، الي بداها واحد طاحس حده اسمه Osamu Tezuka واللي يعتبر الأب الروحي للــ أنمي

 

طبعاً نلاحظ كبر خشمه واللي يدل على إنه طاحس حده وراعي أفكار طاحسة للنعلة !!
<< اللي يتابعون الأنمي بيعرفون وش القصد أكثر لؤؤل
كان فيه طبعا ً بخريطة العالم جزر طارفة ومحد معطيها وجه اسمها اليابان عاد الشعب الياباني شعب طاحس ومرجوج وخبل وغني وكشخة ووخرووا عنه ! بس أيام الأبيض والأسود كانوا يقرون المانجا مساكين
ستوووووووب !! وأنا اللي أتنح أكثر -- وش الــ مانجا ذي بعد ؟!
المانجا هي القصص المصورة اللي يسوونها هالشعب الطاحس ويرسمونها ويوزعونها ويبيعونها – لدرجة إن اللي يبيعون جرايد لازم تكون معاه كومة مانجا ومن كبرها تحسبها كنها دليل تليفونات << يااااقدمـــــــك

 

ولــ وهلة ظنيت إنها شي عادي بس لما عرفت إن مافيه أحد في اليابان مايقرا مانجا تنحت ! لدرجة إن حتى رجال الأعمال لهم مانجا خاصة ! والحريم لهم سواليفهم لحالهم ! والعشاق عايشين قصة حبهم بالمانجا وقلوبهم صارت كبر خشومهم الطاحسة !
والعجيب أكثر إن مبيعات المانجا توصل عددها بالأسبوع الواحد بس إلى خمسة ملايين نسخة !! << وربي شعب طااااحس
حتى إنه عندهم مخزن كامل بس للمانجا يسمونه الــ Manga Superstore واللي بالاساس مخزن أبو ثلاثة أدوار فيها أكثر من 120ألف مانجا مختلفة بأجزائها كاملة !!الوناسة إن الشعب الياباني " الطاحس " شعب عايش حياة عادية – يدرسون \ يشتغلون \ يسوون اللي عليهم بس لكل شخص منهم هالملاعين له عالمه الخاص مع المانجا ،،

Mamoru Oshii

 

واحد من الطاحسين من مخرجين افلام الانمي يقول:
" انا لا اعتقد ان الشعب الياباني الطاحس ممكن يعيش حياته بدون مانجا -- بيوتهم صغيرة وبلادهم صغيرة ولكن يوجد الكثير منهم اليابان مكان قاسي يعيش فيه -- لذا ممكن انهم يعيشون حياة المانجا لفترة قصيرة تجعل حياتهم الطاحسة اسهل نوعا ما من الحياة اليومية "
عاد بعدها عرفت إن هالمانجا هي هذه اللي ياخذونها وينتجونها على أنها مسلسلات وأفلام أنمي وهي اللي الحين نتابعها ونتحمس معاها ونتوهق معاها ونسوي تقرير عنها
<< منك لله يا اختي
على عكس باقي الفنون اللي تنتشر في البداية على شكل كتب وروايات بدون وجود الصور لأن الأنمي يعتمد في روايته على الصور ويوصل الفكرة عن طريق الصورة والقصة بحد ذاتها ..
وعلى كذا !! الأنمي واللي مأخوذ من المانجا أساساً مبني على معتقدات هالشعب الطاحس وعاد يلعن أووووم المعتقدات الطاحسة ! وعشان كذا بعد ترى اليابانيين يستغربون إن فيه ناسٍ مهابيل وطاحسة غيرهم يحبون المانجا والأنمي !
لأن عشان تفهم الأنميات تحتاج إنك تفهم معتقداتهم وطرق معيشتهم لأن الأنمي والمانجا فيه الكثير من طريقة أكلهم وتقاليد لبسهم لأنهم صمموا علشان جمهور ياباني بالخصوص مادروا إن فيه ناس ملاقيف وماغير تحميل ومتاااابعة !

السؤال اللي يسدح نفسه – وش ميزة فن الأنمي طيب عن باقي الفنون ؟!

 

أكبر ميزة للــ أنمي إنه ياباني – عشان هالطاحسين لهم نظرة خاصة بالحياة – هم يشوفون بأن الحياة موب عادلة وموب مستقرة ! على عكس الأمريكان اللي يعتقدون إن العالم عادل !
وعلى هالاساس \ في الأنمي الطاحس \ ممكن تلاقي أبطال القصة يموتون بكل بساطة وبدون أي سبب ! والشر ينتصر بسهولة << أحلى شي أصلا
والشخصيات نفسها ماتعتمد بس اذا كانت طيبة أو شريرة – لأ \ فيه شخصيات لا إلى هؤلاء ولا إلى هؤلاء – ماشي براحتك ياخي مصلحتك !!
والوفاء والثقة وهالقيم اللي نقراها بالكتب ونسمع عنها ماهو شرط يكون لها هدف لأنها هي هدف بحد ذاتها ! وعشان كذا لما شخصية تموت موت بطولي " زي الأفلام الهندية " ماهو معناتها النجاح وإن الناجين راح يعيشون عقب تضحيته ! وبالأصح ممكن تلاقي شخصيات تموت وتندفن علشان سبب ممكن انه ينجح وممكن لأ !
ميزة ثانية طاحسة في الأنمي إنه يعتمد على نظرية حلوة بالحياة واللي هي Mono no Aware واللي تعني إن الجمال يزود بزواله -- بالضبط مثل أشجار الكرز اللي تعتبر من أحلى الأشجار علشان فترة عمرها قصيرة نسبياً .. ولو بنعطي مثال نروح لصورة بنت أمورة واقفة تحت شجرة كرز

 

لما تفتح عيونك كنك ضفدع بتبدا تفكر بأن هالبنوتة وراها مستقبل طاحس << تخسى وتعقب مردها البيت لؤؤل
ويمكن بعد لو تشغل هالتنكة اللي براسك بتعرف إن هالبنت ممكن إنها تموت موت بطولي قريب
ويمكن ان فصل الربيع مجرد أيام خالية ! وإنت وخيالك عاد ..
طيب أوكيه أوكيــــــه -- عرفنا وش هو من شنب – جا دور نعرف وش أنواعه !
بعد إنتاج الأنمي تكون له أنواع وصيغ مختلفه تقريبا هي كلها ثلاث أنواع ..
المسلسلات التلفزيونية الــ أطحس شي (TV SERIES)
أغلبها تكون 26 حلقه أو أكثر على حسب القصه ومده الحلقه نص ساعه تقريبا .. والرسوم تكون واضحه والتركيز يكون على شخصيات المسلسل الطاحسة .. وأول شي تعرض على القنوات الأساسيه أو اللي اشترت حقوق المسلسل وبعد كذا تتحول للفديو ..
مسلسلات المشاهدة المنزلية المطحوسة (OVA SERIES)
هذي تتكون من 14 حلقه أو اقل وتكون مدتها من 25 دقيقه للساعه وأحيناً أكثر .. والرسوم تكوون ممتازه .. والأوفا تجي مكمله وتوضح القصه الأساسيه اللي أنعرضت بالمسلسل لأن أغلب المسلسلات تجي نهايتها مو واضحه ولا مفهومه ويكملونها بالأوفا المطحوس .. وممكن على أساسها يطلع مسلسل جديد أو قصه جديده .. والأوفا تنتج خصيصاً للفديو وما تعرض على القنوات الرسميه لهم ..

الافلام -- نص طحاسة (MOVIES)
تكون الرسوم فيها عاليه الدقه والقصه تكون مباشره وما فيها تركيز على الشخصيات مثل المسلسل .. وتكون مدته بين الساعه للساعتين .. وبالبدايه تعرض بدور السينما وبعدها تتحول للفديو ..
وهذه قصة الشعب الطاحس وأنمياتهم الطاحسة عشان أفتك من حنــّــة أختي ! ويلا خلاص لا يضيع الوقت أكثر -- بروح أطحس !





Bleach

 

من أمتع المسلسلات اللي تحمل طابع الأكشن والمتعة ولمحبين المطاقق بعد والتفلت
مجمل القصة تدور حول شخصيات يتمتعون بقوى خاصة يحتكون مع عالم الـ Soul society بأكثر من موقف ويندمجون معاهم في محاربات وضرابات وهواشات !
الانمي يروي قصة او احداث لحياة طالب بالثنويه .. اسمه "كوروساكي ايتشيقو kurosaki ichigo"
ايتشيقو طالب ثانوية طاحس عنده قدره غريبة وطاقة روحانية زايدة عن اللزوم حبتين كونه يقدر يشوف الأشباح ويتكلم معاهم – صار له موقف مع واحد من الوحوش وطبت المنقذة واحدة لابسة ساموراي وتفزع في الموقف ومع دلاخة اتشيقو الدرج عرض بيته وأهله للخطر وانجرحت هالساموراي وهي تدافع عنه واسم البنت Kuchiki Rukia كوتشيكي روكياونتيجة لهالظروف قررت كوتشيكي روكيا انها تسلف الحبيب جزء من قوتها عشان يعالج الموقف ومن بعدها والولد ما ارتاح أبد – وللقصة طبعا بقية ،،



 

Kimi ga nozomu eien

 

من أروع الأنميات اللي تخوض الدراما والرومانسية
أكثر المواقف صعوبة لما تكون المشاعر مختلطة بين الأصدقاء -- خصوصاً لما الحب يتدخل بينهم ويفرق بينهم !وفي هالأنمي – كانوا أربعة أصحاب طاحسين على قلب واحد كل واحد فيهم يكن مشاعر خاصة ومايبغى يقولها – ولما تشجعت بنت منهم واعترفت للي تحبه بحبها وبدوا يتواعدون مثل أي عشيقين تدخل القدر وصار اللي محد يتوقعه وتشربكت الأمور جداً بعدها !
مسلسل مليء بالمشاعر والدموع في 24 حلقة من أروع ماراح تشوفه ..

( reat teacher Onizuka (GTO

 

مسلسل يقول أتحداكم تلقون اللي أطحس مني ! شي مقلع وبقوة تخليك تتسدح بالارض من الضحك والفلة
مسلسل يعتمد على مدرس داج وطاحس وآخر همه التدريس كونه راعي عصابات ومشاكل لكنه التحق بوظيفة التدريس وعلى حظه البايخ \ الحلو حطوه على ألعن صف بالمدرسة !
وتبدأ خطط الطلاب اللي غطوا على مدرسة المشاغبين نفسها واستعملوا أنواع الطرق القانونية والغير قانونية لــ تطفيش الباش مهندس أونيزوكا لكن الرائع في الموضوع إنه محد فيهم عارف وش كثر هالبني آدم خبل وطاحس وأحسن شي بالعالم !
مسلسل يخليك تطنش الحياة وتعيش يومك في 43 حلقة طاحسة حد الثمالة !



Death Note

 

الكثير يعتقد إن الأنمي قائم على الطق والطقاق والطحاسة والضحك ! لكن الأنمي هذا رد على كل الألسنة اللي نطقت بهالكلام -- هذا لأن الأنمي يعتمد على قوة التفكير والاستنتاج والإثارة على عكس بقية الأنميات ..

المسلسل يتكلم عموماً عن شخصية طالب عبقري طموحه لا يعلى عليه طموح -- كان عايش حياة روتينية مملة لين ماطاح على ( دفتر الموت ) ! واللي يعتبر دفتر خاص بـ آلهة الموت بحيث أي اسم ينكتب فيه صاحب هالاسم بيودع الحياة بــ 40 ثانية !!
و هالطالب الطاحس قرر انه يبيد المجرمين عن بكرة أبيهم وينظف العالم منهم ومع كثرة موت المجرمين الغامض تدخلت الشرطة وجابت مخبرهم الأطحس شي بالعالم والملقب بـ L وصارت !

المسلسل مازالت حلقاته تنزل أسبوعياً ورغم إنه ماتجاوز الـ 20 حلقة إلا إنه أثار الكثير من
المتابعين وشدهم للأنمي وحببهم فيه بعد لأنه جداً طاحــــــس وفكرة جديدة شاطحة !


Fullmetal Alchemis

الكيمياء = السحر
هذي اهم فكره بالمسلسل وبقدره الكيمياء تقدر تسوي اللي تبي لكن الأمور الخاصه بالأرواح وإعاده الأموات للحياه لازم يكون فيها تضحيه بقيمه مساويه لها وهذا هو قانون الكيمياء ..
أهم شخصيات المسلسل أد و آل أخوين أعمارهم ما تعدي الـ 15 وبدايتها لما يحاولون يرجعون أمهم للحياه بفن الكيمياء ويفشلون وعلى أساس هالتجربه الفاشله فقد إد يده اليمنى ورجله اليسرى وآل فقد جسمه كامل وبقت روحه قدر آل ينقذها ويحبسها داخل درع ,,
بعد اللي صار قرر الأخوين الإنضمام بالجيش عشان يقدرون على ملفات سريه تتكلم عن حجر الفيلسوف اللي يحتوي على طاقه قويه جدا ومن يمتلك هالحجر يقدر يتجاهل قانون الكيمياء وعشان كذا إد يحتاجه يبي ييرجع يده ورجله وجسم اخوه بعد ,,
ويواصل الأخوين رحله البحث عن حجر الفيلسوف وفي الرحله يصادفهم أشخاص يبحثون عن الحجر وكلن له اسبابه فيه الطيب وفيه الشرير ،،
هذي فكره المسلسل العامه أحداثها كثيره ومفاجئتها حلووه والمسلسل ما ينمل منه
وحلووه متابعته ،،





 

 

 

 

 

 

تنفيذ التقرير
دفا الكون ,, yojimbo