بسم الله الرحمن الرحيم
السلام عليكم ورحمة الله وبركاته ، تحية طيبة وبعد
،
( تعبت من الفصحى ابتكلم عامي
)
أول شيء حسبي الله عليكم يالشيون والله اني
إشتقتتتتت لكم ولمواضيعكم ولردودكم ولــ
جوّكم هذا وانتم شهبان ٍ
لهبان وش لو انكم زيون كان علوم
،
ثاني شي داري ان بعض ربعنا الاولين يكحكحون هالحين
ويقولون وين جبتوا ذا المغبّر منه وبعض الجدد
يقولون وش يبي ذا الاردني
سابع شيء
طلبو مني الاعزاء في المجموعة البريدية إني أكتب
موضوع بمناسبة مرور سبعة أعوام على الإقلاع
وما أخفيكم إني جلست لي ثلاثة أيام "
مهنق " أفتح الوورد
وأصكه مدري وش أكتب ، الكتابة عن الاقلاع مهيب سهله
ويبي لها عشر سيرفرات ويالله " تيزي "
!! وشلون أبختزل إقلاع
و إبداع وإمتاع
7 سنوات في موضوع واحد !
بالله فيه أحد يقدر يحط سبع كراتين طماط في قوطي
صلصله واحد ( الله من زين
المثال
) !!
واسمحوا لي مانيب مخلي موضوعي عن مدح الاقلاع لعدة
أسباب أولها : أن شهادتي فيه مهيب مجروحه وبس الا
مصفقة ٍ تصفيق فأنا أحد أبنائه الذين يعتزون
بالانتماء اليه ، ثانيها :
وش أقول ووش أخلي ، !!
ثالثها : لو مدحت الاقلاع الى بكره ماأوفيته
ربع حقه !
عشان كذا أبقلبها سواليف ، وأبسولف عليكم شوي ، بصراحه الى هالحين ما استوعبت انه
مر على الإقلاع سبع سنين "
ياعجل الدنيا " والله
ان كنه أمس يوم يجيب واحد من العيال فلوبي ويعطينيه ويقول شف ذا الموقع يجوز له
وإثره مخزن فيه كذا موضوع من الاقلاع ويوم ناظرتها
وأخق معها وأروح أشتري اشتراك من بكره وأسجل فيه وهذا كان في بداية عام
2000 ومن سجلت فيه وأنا ما أدخل غيره ، تصدقون الين
عام 2004 وانا أحسب مافي
النت مواقع ثانيه غير الاقلاع الين طبيت في
الردادي بالغلط ،
وطبعاً في هالسنوات السبع تغيرت أشياء كثيرة وتطور
الموقع وكثرت منتدياته وزادوا أعضائه وصار أكثر إتساع
و شموليه ، وهو تقريباً في بدايته مثل
القريه صغيّر وتربط سكانه علاقة قويه وكلهم يعرفون
بعض ، وأنواع الميانه بينهم أما الآن صار الاقلاع ماشاء الله مثل
المدينة ، يعني هالحين كثير ما أعرف أساميهم ومنول من زود المعرفه حول ما
أحفظ " أرقام صراويل الاعضاء
" وبالتأكيد أن للمدنية مزايا وعيوب ، ومميزات
مدنية الاقلاع أنها زادت عدد منتدياتها وأصبحت تلبي
كافة الرغبات والهوايات
والميول ، ماشاء الله ماباقي الا يحطون منتدى لــ
هواة التضبيب ومنتدى للكيرم
والمصاقيل
،
وشمولية هالمنتديات أدت لزيادة عدد الاعضاء بالطبع
، الين صاروا أعضاء الاقلاع هالحين
أكثر من عدد سكان قطر يعني ناقصنا قناة فيها كم
مذيع بثر يشبونها بين العرب ونصير دولة عظمى
.
وعشان ما أصير كني مصري ٍ مدهون ٍ سيره وقايلين له مدّحنا
ونعطيك " سبعين قنيه " أببين سلبيات
" عولمة
" الاقلاع إن صح التعبير وهن سلبيتين الاوله التخلي
عن شرط " لاتحكي في الدين ولا السياسه في الجادة "
مما نتج عنه مراثع البعض ـ هداهم الله ـ في الثوابت
بحجة حرية الرأي ، وانتقاد البعضهم منهم لبعض
الصحابه " رضوان الله عليهم " والمشكله أن هالأعضاء
اللي ينتقدون لو تقول له كم أركان الإيمان قال لك ثمانيه
وإذا قلت له عددهن عد لك أربعه من أركان الاسلام
وقال الباقي مايحضرني الآن !
، وبعضهم الله يصلحه مسوي فيها " الألباني " على
غفله وخذ ياتصحيح وتضعيف في الاحاديث ولو تناظرون شهادته
لقيتوها خامس لا وماخذها ليلي بعد
!!
وأما السلبيه الثانيه من وجهة نظري هي إعطاء
حبايبنا النصراوينن منتدى !!
بصراحه أول ماشفت منتدى النصراويين فطست من الضحك وقلت الله يقلع ابليس
أبو محمد مايخلي العيَارة عنه
، أحسب انها مقلب منه ، وتوقعت اني إذا فتحته أبلقى كتبة "
معك الكاميره الخفيه " والا صادوه " والا
شيء من هالقبيل ، ويوم فتحته والقاه منتدى " صدزي "
وأفرّك عيوني وأشوف المواضيع ، : (
النصر قوي بس الحكام غشاشين ، سامي مايعرف يلعب ،
سعد أحسن لاعب في العالم ) .. قلت بس هذيّي
مويضيعاتهم , وبصراحه ولاهوب حقران للنصر
بس اني أحس إن المنتدى واااااجد عليهم و إسراف وتبذير
والاسراف حرام ومايجوز ، يعني المفروض حاطين في الرياضة المحلية موضوع
ومسمينه " موضوع النصراويين " ومثبتينه بعد عشان
نكون حقانيين ، بالله وش هالمواضيع اللي بيناقشونها ؟!!
كل حتسيهم ، سعد وماسعد والهلال بطولته
بالغش والحكّام ظالمين النصر والا هم قويين والمفروض ياخذون الدوري كل سنه ،
وأنا من هالمنبر أطالب من أخوي الغااااااااااااالي
أبو محمد أنه يحط منتدى لنادي الوشم وش زود
نادي النصر عنه ، كلهم من داجين ، ولاعبينهم من جنبها
، ومافي روسهم كورة !!
نرجع للاقلاع وأقول يكفي الاقلاع فخر أنه
المدرسة الرائدة للكتابة الساخرة في النت ، يكفي
الاقلاع أنه خرّج عدد كبير من المبدعين وقدمهم
للإعلام بجميع قنواته بحيث وفر لهم الارض الخصبه
والماء الصافي والهواء النقي والتي ساعدتهم
على زرع بذور إبداعهم حتى نمت و أنبتت من كل زوج بهيج
.
وفي الاقلاع ميزه مستحيل تلقونها في منتدى غيره وهي الألفة
والمحبة والترابط بين أعضائه بغض النظر عن بعض "
المناقر " اللي يحصل بين الفينة والفينة إلا أن العلاقة اللي تربط أعضائه
علاقة حميمية تحمل كم كبيرمن الحب والحنان
والمودة والنقاء والدفء (
افتح يديك يامطحن تكفى ... أبيك تحضني محتاج لحنان
)
وبصراحه لو غبت عن الاقلاع عشرين سنه مستحيل أنساه
، أو أنسى أعضائه اللي كسبت منهم أخوان وأخوات
يشترون بالذهب وأفتخر وأعتز بمعرفتهم وأخوّتهم
وصداقتهم،
ورغم قل التواصل والقطاعه بيني وبين الكثير منهم إلا أن غلاهم ومحبتهم وتقديرهم
باقيه في قلبي ولن تزول باذن الله
،
إلا إذا أخذ النصر بطوله ، وعلى طاري بطولات النصر
يقول لك ان فيه مشجع نصراوي اتصل على شيخ يفسّر الأحلام وقال له أني حلمت إن
النصر ماخذ بطوله وش تفسيرحلمي
؟قال تفسيره إنك مكثر من
الجريش واللبن قبل ماترقد لاعاد تعوّدها
وماودي أطول عليكم والا لو أبتل أحتسي ماسكت ،
وفي الختام يطيب لي أن أهنىء جميع
محبي الإقلاع من مراقبين ومشرفين وأعضاء ببلوغ
الاقلاع 7 سنوات وعقبال مايطق
الميه وأنتم ترفلون في ثياب
الصحه والعافيه ( ماتجتمع يطق ويرفلون والا
) .. وفي أمان الله
.
أخوكم ومحبكم
أبو طارق
وفي رواية
أبو يارا
،،