.



عدنا بعد أن قضينا عطلة ممتعة في ربوع بلادي , وهانحن نعودة وكلنا إشتياق للمدرسة...... هالكلام الفاضي هذا يصلح مقدمة لتعبير فاشل بعد العطلة الصيفية. بس إذا تبون التعبير الصدق عن شعورهم للعودة للمدرسة هي جملة وحدة بس (عدنا للمدرسة وياشينها من عودة) ماقول وأنا أشوف أخواني الطلاب وهم لابسين شمغ من غير عقل كأنهم بعزا وبناتنا وهن مكتسحات السواد إلا عظم الله أجركم وشدة وتزول ومابعد المدرسة إلا عطلة وأوصيهن بعدم لطم الخدود وشق الجيوب مع إن الشباب يوصون بشق الجيوب ما كأن الفرفرة على مدارس البنات أيام الإختبارات كفتهم, وأنا عندي إقتراح بسيط للوزارة علشان أبناءنا وبناتهم يحفظون المنهج صم .. بالنسبة للعرابجة قصدي الأولاد أقترح كتابة ملخص موادهم على جدران مدارس البنات أيام الإختبارات وصدقوني كلها كم يوم والطلاب حافظين المنهج كله من كثر الفرفرة والقزقزة على مدارس البنات, وبعد إذا البنات جزاهم الله خير وبيكملونها ويساعدون إخوانهم الطلاب بما إنا كل يوم نشوف عبايات شكل ونقشات وزخرفة وخطوط , أقترح عليهن يلبسون عبايات منقوش عليها ملخص المواد ومايمنع بعد تودي عبايتها لخطاط ينقش عليها وسيلة من كثر الألوان إللي يحطونها على عباياتهم وبالمرة لاتنسى تكتب تحت عمل الطالبة وتكتب إيميلها.. يعنى بالله ياشباب لو تشوف بنت وعلى عبايتها الجدول الدوري للعناصر بالله ماتحفظه بس إنتبهوا من ريحة الكربون ..


أما البنات ياحليلهن أمرهم هين فيه طريقة وحدة تخليهم يحفظون المواد كلها وخلال إسبوع واحد بس.. الطريقة سهلة مرة مرررررة. نخلي وزارة التربية والتعليم تسوي عقد مع روتانا. وكل مطرب ينزل ملخص المادة أغنية. وخصوصا النصوص والتعاريف. الوحدة تجلس إسبوع يالله تحفظ قصيدة بس لو ينزلها عبدالمجيد عبدالله. يعنى تعريف المادة : المادة لاتفنى ولاتستحدث من العدم. المشكلة مهوب حفظها بس إلا كيف تنطق تستحدث لايغركم إن أعرف أكتبها ترى ماعرف أنطقها. بس تخيلوها كذا..وهـم كل المواعيــد وهم...والمادة لاتفنى ولاتستحدث من العدم مأسآتي معاك تزيـــد كل البنات بتحفظها قسم ماحلى ياااي تهبل مررررة (أفا كأني صرت بنت). ولو يكون فيه طقاقات يغيرون كلمات أغاني العروس إلى كلمات في الدراسة كان أحسن بعد, والله كم وحدة من أللي تحب الرقص والردح بتصير دافووورة وتجيب العلامة الكاملة . بس المشكلة وقت الإختبار ماتتذكر الكلمات مع اللحن إلا إذا رقصت. تشوف النبات يختبرون وهي جاية متمكيجة بفستانها وجايبها معها مسجل بهيدفون وترقص بنص قاعة الإختبارمعها ورقة الإختبار وتحل ..



والطقاقات يغنون وكل الصعاليك خيالة ..ويازين تأبط شرا بينهم ولافرق الله شملهم عاشوا عاشوا وهي من الحماس تستنزل وتلفح بشعرها بس في النهاية تجيب العلامة الكاملة والبنات إللي ناقدات عليها يرسبون. وش منع مايصير كذا , هما الوزارة أهم شي عندها إن الطلاب ينجحون ..خلاص على قولة محللين الكورة إللي تكسب به إلعب به. يعنى مهوب لهالدرجة بس قصدي ليه ماتصير الدراسة متعة وتعلم بنفس الوقت ليه نطلع عيون الطلاب علشان ينجحون مع إن فيه طرق أسهل وممتعة للطالب وتخليهم يفهمون المنهج مهوب بس يحفظونه وهم مايدرون وين الله قاطهم فيه ..



مشكلة الدراسة عندنا لاماهو عندنا وبس بكل دول العالم ببساطة إن الطلاب مايحبون المدرسة. أنا عندي الحل بس أبي أغير نظام الدراسة بالعالم كله . بروح لـ كوفي عنان ولهيئة اليونسكو مدري اليونيسف مدري اليانصيب , أول شي برفس الباب برجلي , وبقوله ياخي وشيفيكم على الطلاب. إرحموهم وأنا جايب لك مشاكل الطلاب كلها وعندي الحل لها بس أبيك توقع وخلاص.
أول مشكلة قومة الصبح وخصوصا في الشتاء والله يابوعنان لو تشوف ولد أخوي البزر أول مادرس إن تخلي المدرسة ليلي. شفته الصبح ومسكين قلمه الرصاص أطول منه , في عز الشتا متلحف بالبطانية يفطر ويرجف. كأنه عصفور في مطر. خلوها بأي وقت وش يمنع ماتكون بعد الظهر..أنا في أول متوسط كنت أدرس بعد الظهر. يوم كنت في أول متوسط قبل تقريبا عشرين سنة , في حارتنا مافيها إلا مدرسة وحدة وكانت بيت مستأجر بعد, وإمتلت وخلونا ندرس بعد الظهر من الساعة ثنتين تقريبا للساعة سبع لمدة شهر كامل , والله يابو ماأحلى منها خصوصا حصة الرياضة المدرسة ماكان فيها ملعب ونلعب بعد صلاة العصر في ملعب الحارة , بعض المرات نباري فرق ثانية ولانرجع للمدرسة (ماننعطى وجه) , والمش كلة الوحيدة وما كانت مشكلتنا أصلا كان تحت مدرستنا محلات وفيها خياط حريم قبل مانتطور ويسمونه مشغل نسائي, وكلما جوا الحريم قمنا نحذف عليهم من البلكونة بالطباشير, وإشتكوا علينا المدير ونقلنا فصل ثاني ,مطبخ, قسم بالله إلفصل إلي كنا فيه كان فيه مغسلة هههههه وعلى طرف مروحة تشفط الريحة . ياكوفي إذا ماتقدرون تخلونها الظهر أقل شي أخروها خلوها الضحوية مهوب الفجر كأننا نسابق العصافير على رزقها. بس قل لجماعتك ياكوفي عنان إذا صارت المدرسة ليلي يبتسمون علشان مايسجلونهم غياب.



ثانيا : الإختبارت, إنتم حالفين تخلونا نوسوس أيام الاختبارات لو تشوف الحالة النفسية للطلاب والطالبات رايحة فيها , حتى أهلهم, ولا وزودان على ذلك الدور الثاني , لعنبوا إبليسكم حياتنا تنعش سنة غير الجامعة ماعندنا شغلة إلا نحاتيكم. الهدف من الإختبار نفهم المنهج يعني خلوا طريقة الحفظ تولي , غيروا المنهج العقيم إلي كله حفظ بحفظ. الواحد من كثر المعلومات إللي يحفظها ليلة الإختبار من كثر مايسمع كلمة أحفظ وخفظوني ماناقص إلا يلبس حفاظة علشان ماتسرب المعلومة. وسبع وثمانين بالمية من المعلومات مانستفيد منها بعد التخرج .. شف أنا صار لي تقريبا خمسطعش سنة من تخرجت من الثانوي ماقد مر علي ملعون الوالدين الجداء الديكارتي. وليه مشغلينا فيه كل المعلومات نظرية ماهيب عملية ولانحتاجها. إذا فيكم خيرعلمونا هذا مدري وشسمه الدالة إللي تشقلب مرة قمة مرة قاع إللي في الأسهم, وبدال ماتضحكون علينا في إكتتاب المقصف وبالأخير تعطونا سبعين ريال بعد مالهفتوا مننا سبعمية ريال على الزعتر, كذا كان مقصفنا عسى لاهالحين يبيعون بالمقصف زعتر المطاطي, كنت أعض سندويشة الزعتر هي والورقة الملفوفة عليها كأني في جهاد تروح الفسحة وأنا عاضها وأجرها وعيت تنقطع تنمط متر ولاتنقطع وإذا هديتها جت مسرعة وتصك وجهي. وش هالزعتر إللي أبلشتونا فيه ياخي أحد قايلكم إنا شوام, والله مامر على الزعتر إلا في المقصف بسألكم بالله عمر أحد منكم صحى الصبح لقى أمه مسويتهم على الفطور زعتر. أصلا أمي يوم شافته عند العطار بغت تاخذ منه كيلوين تحسبه حناء بالسمسم. بدال الرياضيات نبغى مادرة إسمها إقتصاد وإلا محاسبة وإلا تسويق , العالم تطورت وحنا على الرياضيات جا وجتا ورحتا وجيتا ومادريتا. صار الواحد يمشي وهو موسوس بالإختبارات كلنا صغار وكبار, حتى وأنا رجال وش كبري أيام الجامعة أوسوس بالإختبارات , مرة أيام الأختبارات لما كنت في الجامعة علينا إختبار صعب وكل الليل وأنا أذاكر بس بدون فايدة مواصل وآخر الليل بديت أفهي , قلت مافيه إلا حل واحد أروح لمستشفى وأقولهم أي شي , ياحليلهم في أمريكا يصدقون , بس لوفي السعودية ماتمر عليهم الحركات هذي, المهم وأدخل المستشفى ويدي علي بطنى وأعرج شوي, مدري ليه إذا الواحد يتصنع إنه مريض يعرج , وأقولهم بطنى يوجعني قالت أنتظر في الإستراحة وبيجيك الدكتور...المهم رحت للإستراحة وأنا مواصل وأصك أمها نومة مصحيت إلا علي صوت الممرضة تقول حنا الحين بعد الظهر ودوامي خلص وفيه ممرضة ثانية موجودة بتمر عليك بعد شوي قلت أوكي. بعد ماصحصحت وأشوف على الجدار ملصقات المستشفين جسم الإنسان زي إللي عندنا في السعودية زي الهيكل العظمي وجسم الإنسان, بس فيه ملصق مستحيل تشوفه بالسعودية صورة وحدة شابة صدرها مكشوفة وماسكته باطراف اصابعها الظاهر كان عن الكشف عن سرطان الثدي مدأو عن الوقاية بصراحة ماذكر الشرح زي ماأذكر الصورة. شفت الصورة وأنزل من سريري بسرعة نسيت إني مريض وأتنح قدام الصورة بالضبط وفجأة تدخل علي الممرضة , ألعن أم الموقف إلي زي كذا وأنحرج مدري وش أسوي , بصرف الموضوع مسكت ديدي وأفغصه بأصابعي يعننى أدلكه زي الصورة . ضحكت وطلعت وانا حسيت إني مالي داعي. وكله بسبة الإختبارات إللي خلتنا نوسوس.



وحتى الإنجليزي أهم مادة كرهتونا فيها من طريقة تدريسكم لها وخليتوا كأنها صعبة مع إن تعلم اللغات متعة , شف الحين بزارينا يابو عنان مالك علي حلف كأنهم يعرفون ياباني, وإذا منت مصدق تعال شفهم يلعبون بلي ستيشن قسم يعرفون الإختيارات كلها. من كثر مايشوفون الكتابة إنمطت عيونهم زي اليابانيين, خوفي إذا قلت له تعال سلم حط يدينه تحت حنكه وينحنى لك.




الزبدة يايو هذي شروطنا بس حققوها وإلا ترى بنغيب ولا عاد إنتم شايفين وجيهنا الواحد يدرس في مدرسة الحياة أصرف له من مدارسكم إللي لاهي مخليتنا نعيش حياتنا في مدرسة الحياة العملية ولاهي إللي نافعتنا بحياتنا..




تم بحمدالله
.. ( عمل الطالب / منحلة صواميلة ) ..
.. ( مدرسة الحياة في الإقلاع ) ..
.. ( بإشراف/ قـروب الإقلاع ) ..