|
.  . .. تحيّه جميـ ــله مملوءه برائحه الورد والكادي .. تحيه لكل القلوب العامره بالمحبه والصـ ـدق ! تحيه لاقلاعي الذي يرفرف عالياً بكيـ ـانه و شموخـ ـه تحيه لأهله ونـ ـاسه .. وقلوبـ ــهم الصافيه كـ براءة الاطفال !  ضيف لقـاء المجموعه البـريديه ،، شخصيـ ــه جميله .. مدرسه تسابق التـاريخ فصول من التجارب ،، رجل ملوّّن بـ الاقلاع تماسك كـ الطين وتشكّل كـ السحاب اضاء كـ الدفء تلوّن كـ قوس قزح تهاتفت عليه الـ قلوب ،، كـ الفراشات حول الضياء !  سـ ـار في مطار الاقلاع .. وفي مطار الهبـوط رحلته مستمره .. بـ حكمه و هدوء وغفران هو راكب يربـط الحزام قبل ان يقلـع ،، رجل محفـور في عمق الاقــ ـــلاع .. ..عزيزي .. اقــلاعي يفتح مدارج شوقه امــامك .. يـفتح صاله الشرف لـ استقبالك ! فـ هو حبيبك و صديقك .. شهدت معه في بـداياته مولد الشمس ذات صـباح خرجت من اعمـ ـاقه مضرج بـ الحب والحنين ! وجودك دائـما .. لون جميل .. وانبثاق يـنابيع .. والتماع برق .. فــ ابق دوماً ياشمس الاقلاع .. مؤرخ الاقــ ـلآع .. رايــ ــح فيها .. من كبار شخصيـات الاقلاع تاريخ التسجيل : 30-01-2000 الهوايات: يكثرها ،، الإقلاع والسباحة وركوب الخيل والكيرم وما شابه ! هلالي حد الثماله .. والمعرّف يـاصديقي لايُعرّف .. راااااقي بـ فكره , تـعامله بـ جهده , إخلاصه هذا هو كما عودنا على الوضوح والمنهجيه في العمل انك كـ مطر صيف تأتي في غير اوانك تمنح فرحاً زائـلا وتهب نسـمه عابره وتترك بـ صماتك فوق الرمال الميته وتبيع وهمك الجميـل للمدن الجرداء !
.
. قـــالو عنـه 
. 
.. ( .. صـاد .. )
.. ... ..
.
. .
.. ... .. (
نديـم ) ..
.
. .
.. ( الدبـاب )
.. ... ..
.
. .
.. ... .. (
الكـاسر ) ..
.
. .
.. ( جامعية فيلسوفـه
) .. ... ..
.
. . .. ( الكـاسر ) .. 1 / ماشاء الله عليك يوزرك انصبغ بكل الألوان في الاقلاع وش اللون الي ما انصبغ فيه وودك فيه ؟ هلا بالغالي ابواحمد ... اكذب عليك لو قلت لك ابي يوزري ينصبغ باللون الأحمر (( ليه ماتقول خايف ؟؟ )) ... اللون الحين مايهم كثر مايهم وش يقدم اليوزر نفسه ؟ خلني ارد على سؤالك بسؤال ياالكاسر لو حصل مشكله في الاقلاع ورجعت يوزرات كل الأعضاء لرتبة عضو جديد تتوقع بننظر للكاسر على انه عضو جديد فعلاً مثل احد الأعضاء الي سجل اليوم والا بتستمر نظرتنا له على انه استاذ ؟ يعني الكاتب هو نفس الكاتب حتى لو انصبغ يوزره بكل الألوان .... اوكي فيه نقطه ايجابيه وحيده هي اني لو اخذت رتبه اعلى من الرتبه الي عندي الحين وقتها بس بحاول اطور نفسي اكثر واقدم شي يوازي الرتبه الي اخذتها حتى الكل يقول فلان يستاهل الرتبه الي اخذها . : 2 / معروف عنك انك ابو نوف ..منهي نوف ؟ نوف شخصيه لا وجود لها ... سالفتها اني كتبت موضوع عنوانه (( نوف )) في شهر 3 او 4 مااتذكر والله تحديداً عام 2002 وكان وقتها في المنتدى العام ... في نفس الليله دخلت التشات وحصلت شلتنا اول الله يعيد ذيك الأيام .. من ضمن الموجودين كان ابورويشد صديقي القديم واول مادخلت رحب فيني وقالي اخبارك ياابونوف (( نسبة للموضوع الي انا كاتبه )) ومسكوها الشباب وللحين وانا اتسمى بهالاسم . : 3 / خل نتخيل قمت الصبح ولقيت نفسك بنت ومسكت معاك تسجل بالاقلاع وش بتختار اسم؟ اسئلتك تخوف لكن لازم اجاوب على كل شي ... لو حصل هالشي يالكاسر اتوقع اسجل بأسم فاتنة المزاحميه والسبب ان المزاحميه مافيها اماكن تصلح لتواجد الفاتنات اصلاً والمعنى حتى العالم مايقربون هاليوزر ابد ولا يتوقعون من وراه شي ابد حتى المشاركات @@ : 4 / نستمر وانت بنت منه من شباب الاقلاع الي تبيه يتعرف عليك ؟ احتمال اتعرف على الممرور خخخخخخخخخخخخخخخ وان ماحصل فرصه بحوّل على الرهيب .. وعلى فكره ان تعرفت على الرهيب اتوقع تنشأ بيننا قصة حب واحتمال نتزوج لكن لازم اشاور نفسي كثير هل الرهيب يبيني فعلاً عشانه يحبني والا عشان ثروة ابوي ؟ : 5 / خل عنك الي فوق ؟ وش طموحك بهالحياة ؟ اني اكون بكامل صحتي وهالشي ولله الحمد موجود .. والشي الثاني اني اتزوج بس بشرط احصل وحده ابوها يسلفني المهر واحتمال اسكن عندهم كم سنه لحد مااشوف حل لوضعي . اذا جيت للصراحه اتمنى ربي مايحرمني نعمة العافيه الي انا فيها . الكاسر مرورك يعني لي الكثير .. الف شكر .. . . . .. ( الملقم ) .. 1/ يقول سارتر ( الطيبون مكانهم المتاحف .. والاشرار في الكنيسه ) سؤالي سمعت انك اول ما مسكت الاشراف في بداياتك جيت تثبت موضوع لمراقب غلطت وحذفته خخخخخ صدق والا اشاعه ؟؟ الغالي ابوفهد هلا والله وغلا ... اول شي سارتر وباقي الاسامي الي قلتهم مااعرفهم حتى نكون على بينه الشي الثاني سالفة حذف موضوع للمراقب بعيده عن المصداقيه والسبب او اول منتدى اشرفت عليه في حياتي كان منتدى كروي والمراقبين مالهم في الكوره ... لذلك نقدر نصنفه انه اشاعه القصد منها اثارة البلبله بيني وبين الممرور : 2 / يقول فرانكلين روزفلت ( مافيش دخان من غير نار ) سؤالي : تدور اشاعات كثيره حول علاقتك بطرش بحر .. السؤال ليش ماتحطون حد للاشاعات وتتزوجون ؟؟ هذا الي بيصير ... بس ابوي مسافر انتظره يرجع @@ الشي الثاني قايل لطرش ماابي اسكن عند اهله ابي بيت لحالي .... تدري عاد ياابوفهد على كثر طلباتي وبيت لحالي ومدري ايش لو تقولي ابي كاس مويه ماعرفت اسويه ; ) : 3 / بعد سقوط النظام العراقي قال بوش ( اليوم يولد الشرق الاوسط الجديد ) السؤال : منهو زاحف .. ومنهو سوق الزل .. وبالمره وش رايك في هواية جمع الطوابع .. وعلى دربك وشي اكلتك المفضله ؟؟ زاحف وسوق الزل اخواني اللذان ولدتهما امي (( اول مره اسمع هالمثل )) ... لكن الغريب اني ماشفتهم من زمان والظاهر ماشفت العالم كله من زمان لدرجة اني ماطلعت بالليل من رمضان العام الماضي الظاهر ... سالفة جمع الطوابع مااحبذها والسبب ان الطوابع ماتجي على القروبات @@ ..... اما اكلتي المفضله فهي المقلوبه وهذا سبب تأخري في الزواج للحين ماحصلت وحده تعرف تسوي مقلوبه : 4 / يقول ابن ابي لبابه ( الملل عاده يمارسها الاغبياء ) السؤال بالله مامليت من كونك هلالي .. حياتك خاليه من اي اكشن او اثاره .. تلعبون وتفوزون وتاخذون بطوله طيب وبعدين .. ياحول ياللي ماله حلوي خخخخخ سؤالك في محله ... هالفكره راودتني كثير وفي الأخير اقنعت نفسي اشجع فريق آخر ... وفعلاً لما بديت اشجعه ومن اول مباراة خسرنا من الفريق الصاعد 4/1 وبذلك تحققت امنيتي في اني اشجع فريق اي كلام ... بس بعد 24 ساعه حسيت بعقدة الذنب وحسيت ان الكوره صارت عندي مثل المصاقيل لذلك رجعت لفريقي الأصلي وقلت الشكوى لله بنصبر على كثرة البطولات ابوفهد مازلت احبك ومازال بيننا الكثير .. لكن للأسف انت حارمنا من اننا نطلع هالكثير لازلت اتذكر نقطه مهمه واتشرف فيها وهي اني من اوائل الناس الي تعرفوا عليك شخصياً من خلال نقاط حول موضوع (( حديث الذكريات )) الي كان يتكلم عن تاريخ الاقلاع ... القصه طويله والأكيد انك مانسيتها واتمنى لك كل الخير . . . .. ( مدرس عسكـري ) .. 1 / تقول من هواياتك الكيرم,,, السوال هل تلعب الكيرم وتحط بودره او تفضلها خشنه ؟ البودره في الكيرم على حسب اللعب وعلى حسب الحماس ... الا مااستغربت يامدرس ان الكيرم هو اللعبه الوحيده الي مالها موقع على الانترنت ؟ وكان لها موقع وانا ماادري عنه ياليت ترسله لي على الخاص حتى اطور نفسي : ) : 2 / وهل لحقت على عهد جمال عبدالناصر ؟ وانت الصادق جمال عبدالناصر مالحق علي لأنه توفي قبل تجيبني امي . . . .. ( بنت الـوادي ) .. 1 / ليــش انت هلالي ؟ طبيعة الأنسان دايم يبحث عن الأفضل .. وانا بحثت عن الأفضل رياضياً وحصلت الهلال ولكن يبقى لكل قاعدة شواذ في كل المجالات لذلك تحصلين البعض القليل من الرياضيين مع غير الهلال : 2 / ايش برجك ؟ عارفه .. هالسؤال الظاهر مر علي 12 مره وكل مره اقول برج غير عن جد ماادري وماعمري فكرت اني ادري عن هالأمور لأنها كانت ومازالت بالنسبه لي خرابيط لا تودي ولا تجيب : ) : 3 / مين فنانك/فناتك المفضلين من العرب ؟ ابونوره هو المفضل من اول والحين ماابي اقول وبعدين يمكن ربي يستجيب دعوتي واكره الأغاني ....اما من الفنانات حالياً نوال الكويتيه .. واحلام مااحبها (( وهي قالت من ماتحب خخخخخخخ )) . : 4 / مين فنانك/فنانتك المفضلة من الاجنبي (اذا كنت تسمع اجنبي يعني) ؟ مااسمع اجنبي : 5 / ايش الخصلة اللي تحسها احسن خصلة في طباعك ؟ هذا السؤال المفروض انا الي اسأله للناس ماهو العكس ... مااتوقع اني في يوم بمدح نفسي ابد الا بالعكس اشوف نفسي مليان عيوب واحاول اقلل منها واتحاشاها : 6 / ايش اسوء طبع فيك ؟ كثير وكثير مره بعد ... العصبيه هذي على راسها والتسرع بعد الي ضيّع مني اشياء كانت اساسيات في حياتي وللحين متحسف عليها مره .. العصبيه سببت لي مشاكل صحيه كثيره وعانيت منها سنين طويله وللحين احاول اكون حليم في امور كثيره ومااتسرع حتى مااخسر اكثر مما خسرت ... وعلى فكره اعتقد ان العصبيه والتسرع مرتبطين ببعض لأن الأنسان الهادي يفكر مليون مره قبل يصدر اي قرار اما العصبي عكس هالشي تماماً . : 7 / كم عدد اخوانك (اذا كان عندك اخوان) وترتيبك بينهم ؟ احنا سبعه خمسه اولاد وبنتين وانا الثاني بينهم : 8 / ايش نوع سيارتك ؟ من النوع العادي (( وهي قايله ان معك طياره ؟ )) .. يعني مثل باقي السيارات الي في الشوارع : ) : 9 / هل انت مدخن ؟ لا ولله الحمد : 10 / ايش اكلتك المفضلة ؟ المقلوبه كما اسلفت وقلت هالشي للملقم : 11 / وين تحب تقضي اوقات فراغك (غير البيت) يعني مكان معين تحب تروحله دايم ؟ في مقهى واو في الملز (( وشو ابولمخته : D )) ... اكثر الاحيان في البيت احب اجلس في البيت كثير وكثير مره لدرجة ان جاني ايام ارجع من الدوام الأربعاء وادخل السياره للبيت واطلعها السبت للدوام ... يعني جلسة البيت احبها بصراحه بس تجيني اوقات واشتاق للشباب واحصل نفسي لا إرادي طالع لهم وهم ولله الحمد كثار وتقريباً 99% من اعضاء الاقلاع : 12 / ايش رايك بحقوق المرأه ؟ وشو سواقته ؟؟ @@ مايجي طاري حقوق المرأه الا ويجي طاري قيادة المرأه !! بصراحه ماادري ولكن هل قيادة المرأه هو الحق الوحيد لها ؟؟ المفروض انا الي اسألك هالسؤال وتجاوبيني وش ناقصك كبنت اذا استثنينا السواقه ؟ : 13 / فلمك المفضل ؟ باتريوت لميل جيبسون وكل افلامه بصراحه احبها : 14/ مسلسلك المفضل؟ خالتي قماشه : 15 / كتاب قريته وعجبك (اذا كنت من النوع اللي يقرا كتب) ؟ البدايه والنهايه ... كتاب اكبر من اننا نسميه كتاب لأنه بحر : 16 / فيلمك الكرتوني اللي كنت تحبه اكثر شي وانت صغير ؟ توم وجيري ... وللحين انا وعيال اختي الصغار نتسابق من ينسدح عند التلفزيون اول : ) . . . .. ( مـاجد ) .. رايح فيها .. انسخ بطاقة احوالك ونزلها بذا وخربط على صورتك بالطامس عشان مانشوفك خخخخخخخخ .. ثم اكتب اسمك .. وعنوانك .. وتاريخ ميلادك .. ورقم بطاقة الاحوال الطويل .. وبس ! اسمي وليد عنواني الرياض تاريخ ميلادي يوم ان امي تجيبني رقم بطاقة الاحوال ضاع مع الاسهم الله لا يوفق العدو : D : السؤال الثاني .. منهو العضو الي تعتز به كثيرا بالاقلاع ؟ .. لاتقول حنش .. ترا سالفة اني امدح راعين الحلال عشان يعطوني رتبه راحت موضتها خخخخخخخخخخ كل اعضاء الاقلاع بصراحه .. ولكن يبقى الصمرقع على رأس القائمه لاني شخصياً تعلمت منه اشياء كثيره مره وللحين محتفظ بمواضيعه القديمه واقراها بين وقت ووقت ... والشخص الثاني المنسدح الله يذكره بالخير لأن تواجده اول في اي موضوع معناه اننا بننهبل وبنشرح وش معنى الاقلاع وليش تسمّت الساحه بهالاسم ! : السؤال الثالث يارايح فيها .. منهي الي بسببها رحت فيها ! مفيش والله .. السالفه ومافيها اني سجلت بإسم قبل رايح فيها وماصلح لي لأنه غير اقلاعي .. حاولت اسجل بإسم ثاني فكرت وتعبت وانا افكر وصادف هالشي اني عند واحد من الشباب وكان عنده كينوود واسمه في الكينوود رايح فيها اخذته وسجلت فيه ومشت اموري : السؤال الرابع .. خلك محايد ولو انه مستحيل تجي هلالي ومحايد .. ماتنقهر لما تشوف الاقلاع ازرق بابيض ! قلت الالوان يعني ! ههههههههههههههههههههههه تخيل الاقلاع اصفر وازرق ؟ يااخي انا مارح ارد عليك ياماجد ولكن شف موضوع حنش الي يتكلم فيه عن الستايل الجديد قبل كم يوم وشف العالم كيف يطالبون بالشكل القديم وقتها بتعرف ان الاعجاب بهالشكل واللون من الجميع وليس رايح فيها لحاله : ) : السؤال الخامس .. يقولون انك شق .. صدز هالكلام ؟ شق = مزيون بالحيل ! اشاعه يارجال ... وعشان تتأكد خلنا نستاجر استراحها ونعزم كل العيال منها تتأكد انها اشاعه ومنها نلعب كوره : السؤال السادس .. تأيد خصخصة المنتديات بالاقلاع ؟ افضل الاقلاع يبقى مثل ماعرفناه ... ولو اني مافهمت تحديداً نوع الخصخصه الي تقصد ! . . . .. ( ابوساره الهلالي ) .. السؤال نمبر ون : طلعت بيروت ( قبل الحرب طبعاً ) .. ودخلت فندق وجيت تحجز غرفة لقيت فلوسك ماتكفي .. والجو بارد ولا تقدر تنام في الرصيف كالعاده .. يوم جيت تديور وتطلع.. انفتحت الغرفتين اللي بوجهك .. الأولى واقف عند بابها يوسف جازع ويقول: الغرفه تحت أمرك وكلنا سعوديين .. والغرفه الثانيه عند بابها نانسي عجرم لابسه قميص نوم وردي طويل وياصل لين سرها وتقول : واااو شو هيدا .. رايح فيها عنّا بليبنان .. وحياة عويناتك ماتنام الا عنطي .. تعالا أرّب نص نص وارقع زي زمان انت في هالظرف المنبثق من أعماق الدهشه وش راح تقرر؟ أين تطس بالعربي ؟ من تنام عنده ؟ إحساسي يقول أنك بتختار غرفة يوسف جازع لأنك هلالي اتوقع اختار نانسي بقولك لي ... اول شي جازع اعتزل وقبل اعتزاله لعب للوحده يعني ماينتمي للهلال خلاص اما نانسي للحين صغيره وفيه امل نتعاقد وياها واحتمال تلعب محل خالد عزيز : سؤال نمبر تو :- هذا السؤال مطلوب منك الصراحه في إجابته لأن حياة أشخاص كثيرين متوقفه على هالسؤال :- كنت تشارك في منتدى آخر غير الاقلاع مع العلم انك من مؤسسي ذلك المنتدى ثم توقفت عنه .. ليش ولماذا مع التعليل وإعراب ماتحته خط .. سؤال سمعته كثير مره لكن انا عاهدت نفسي اتكلم بصراحه : ) اول ماصارت مشكلتي في الاقلاع طلعت وانا ماادري كيف بيكون وضعي خصوصاً اني تعودت على الكتابه وصاير استمتع بهالشي ... فتح المنتدى الي انت تقول ومنحوني شرف اول عضويه فيه بعد الإداره وبعد منحوني شرف كتابة اول موضوع في تاريخ المنتدى ... وقتها اتذكر كنت بزواج وكلموني وقالوا لي ان عضويتي جاهزه ويسألوني متى ارجع من الزواج عشان اكتب اول موضوع في المنتدى وفعلاً هذا الي حصل واستمريت اكتب في المنتدى حتى وصلت مشاركاتي حوالي 2500 ولكن وللأسف للحين احس فيه شي مهم ناقصني !! حاولت اتناسى هالشي وكتبت في منتديات ثانيه ولكن مافيه فايده .. الشي الي فقدته هو الاقلاع نفسه . كنت اقول الاقلاع هو الي اكتشف يوزر رايح فيها وماهو انا وهو الأحق فيه لذلك صاير افكر في الاقلاع كثير وصاير احاول انسى التفاهات الي طلعت بسببها من الاقلاع خصوصاً ان طلعتي من الاقلاع كانت في لحظة غضب وانا مثل ماقلت قبل كذا التسرع احياناً يخسرني اشياء كثيره .. المهم تجاوبت مع المنتدى وللحين ماانسى موقف ادارة المنتدى منّي خصوصاً انهم اخوان لي وللحين افتخر فيهم ... بعد هالشي بفتره حصلت اسمي يسجل تلقائياً في اي منتدى جديد وبدون مااطلب وكان هالشي يزيدني شرف بصراحه ... بعض المنتديات اعطتني رتب كبيره مره والبعض الثاني اعطوني غير هالشي وفيه منتدى اعطوني فيه مراقب وللحين ماتجاوزت مشاركاتي 30 مشاركه : ) القصد ان كل منتدى يكون لي تواجد فيه يكرموني بشكل مارح انساه لهم والسبب ان اسمي رايح فيها ولكن من اول من اشرف على يوزري رايح فيها ؟ ساحة الاقلاع اكيد هي صاحبة اليوزر لذلك من باب اولى يشتغل اليوزر من جديد في المكان الي طلع منه .. فيه نقطه مهمه ياابوساره فرقت معي كثير وكثير مره وهي الردود نفسها ... في وقت من الاوقات بعض مواضيعي في الاقلاع كانت توصل الردود فيها 150 رد او اكثر بينما في المنتديات الثاني اذا وصلت الردود 20 الى 25 اعتبره انجاز وانت بنفسك جربت هالشي وعرفت الفرق الكبير بين الجماهيريه والعكس ... قبل كم يوم رديت عليك في منتدى متخصص وماشاء الله انت بكل منتدى الكل يعرفك .. لو لاحظت تاريخ تسجيلي في ذاك المنتدى تحصله 2001 ومشاركاتي ماوصلت 500 للحين .. زبدة الكلام ان يوزري ملك للإقلاع اكثر من ماهو ملك لي شخصياً لذلك شي اخذته من الاقلاع لازم في يوم ارجعه للاقلاع نفسه : ) : سؤال نمبر ثري:- في الإقلاع قديماً أقلام تخلي أبو جيرانكم يقوم من النوم وهو يلعن بسبب ضحكاتك وقهقاتك الصاخبه .. لكن حالياً مافيه .. تتوقع ليش وهل لدخول النت في كل بيت سبب مباشر في ذلك ؟ وقتها ياابوساره كان النت جديد علينا وحب الاستطلاع اعتقد انه غريزه في البشر عشان كذا قلنا نجرب شي جديد ... دخلنا مجال النت وبعد كم شهر تفاجأنا ان النت عطانا الشي الي نبي من خلال ساحة الاقلاع والي نبيه كان الضحك والهبال والهستره والسواليف المهبوله والي ساعدنا على هالشي ان شخصياتنا مبهمه يعني انهبل من اليوم الى بكره مارح يعرفك احد وفي نفس الوقت النت بشكل عام والاقلاع خصوصاً اظهر الكبت الي داخلنا وخلانا نكتب بحريّه ... يعني طلعنا من سالفة ممنوع او غير قابل للنشر الي كنا نعاني منها من ايام صحايف المدرسه : ) ماكان الكل يدخل نت بذاك الوقت حتى اتذكر وقتها اول ماشريت جهاز كان صاحب المحل يخيرني نوع الويندوز الي ابيه 95 او 98 قلته وش الفرق قال 95 اخف عشان النت ضحكت عليه وقلت له حط 98 حنا وجيهنا وجيه نت !! وبعدها بكم شهر ابحرنا في عالم النت .. وكانت الدعوه تجربه اصلاً لكن الهبال والأشياء الغريبه بشكل عام صلحت لنا وفضلنا الاستمرار الى يومك ... لو نرجع لساحة الاقلاع اول كان فيها اسماء جداً مجنونه وكانت الفكره انك تسجل في الإقلاع عشان تنهبل والدليل اسم المنتدى الي اخذوه من قهوة الاقلاع للمبدع عبدالسلام الهليّل . بختصار ... صايرين نسولف في امور كنا مانقدر نسولفها ويا اهلنا واخرجنا الكبت الي داخلنا لكن وينهم الحين ؟ البعض غير اسمه وهدّا اللعب والبعض انقطع نهائياً والبعض صار معروف من ناس كثيرين لذلك خفف من هالأمور ... والاحظ ان قليلين جداً استمروا ماغيروا اسمائهم الي دخلوا فيها .. ومثل ماتفضلت النت اصبح في كل بيت والاقلاع اصبح متعدد المجالات لدرجة اني ادخل منتديات ثانيه تابعه للاقلاع واحصل اسماء مشرفين اول مره اعرفها والله والسبب ان الاقلاع اصبح امبراطوريه وفقد الكثير من فكرته الأصليه وهي الأستهبال وكتابة المواضيع المرجوجه : نمبر فور :- جالس في محل بروستد التوت تحتري طلبك يجهز .. فجأة دخل واحد وسيم أنيق وجلس جنبك .. مع السواليف أكتشفت ان هالشخص الوسيم الله يذريه باسمه هو أبوسارة <<< أنا تحط رجلك وتجحد بروستدك ؟ او تخمني في حضنك ؟ أو تلفعني بالنعلة وتقول طس للبروستد الذهبي لا أشوفك هنا .. اول شي البروستد وبعدين لاحقين عليك ههههههههههههههههه البروستد ياابوساره ان مااكلته حار والا مايصلح لذلك الوعد بعد البروستد ... تدري عاد قبل كم يوم كنت عند المطعم المذكور انتظر الطلب وتفاجأت ان اللاعب الشاب منصور الموينع يتواجد في ذات الوقت وعلى طول شكيّت انه مارلبورو : نمبر فايف :- هالسؤال يبي لك كاس مويه جنبك لأن ريقك يمكن يخونك ويجف .. في الاقلاع بين كل فترة وأخرى نفقد ناس .. نروح نسأل ندورهم نلقى فوق أساميهم مكتوب : تم نتف ريشه .. ثم فجأة يجونك المتحمسين ويعلنون البراءة منهم .. وش موقفك بكرة لو تلحطت ولقيت أبوسارة اللي يحبك منزل فيك رد سب وشتم وأن الاقلاع حالياً أفضل بدونك ؟ <<< أسويها ترى تدري ياابوساره الأكيد ان سؤالك هذا من باب المزح لكن هالشي حصل فعلاً ... لما صارت المشكله في الاقلاع ناس سبّوني بشكل مبالغ فيه بصراحه مع اني كنت انا وهم اكثر من اخويا وكان بيننا علاقات حتى برا النت ... بعد مارجعت نزلت موضوع للحين ماانساه وكان عليه اكثر من 190 رد وكلها ترحيب وكان من اوائل الي رحبوا فيني هم الي قالوا ظف وجهك اول ماطلعت ومنهم الي ارسلوا لي عاالخاص ... وماانسى واحد منهم ارسل لي اغنية ابونوره انورت بقدومك الدار ياغالي وللحين محتفظ فيها على فكره: ) لذلك ياابوساره لو اعيش الوضع مره ثانيه مااعتقد انها بتفرق معي لأنها صارت لي قبل ; ) : نمبر سكس والعياذ بالله :- معروف أنك تحب الحواري القديمة .. وش موقفك وأنت تدور في ذيك الحواري طلع لك ثلاثة نيجيريين ماقد شافوا أهلهم من عشر سنين .. ومعروف انك وسيم .. وحاولت تنحاش ولا قدرت لأن فيه واحد منهم ابن كلب عكرف لك وجيت على خشتك ..ودخلوك عزبتهم وانت تصارخ.. وفجأة قمت من النوم لقيت ان هالموقف كان حلم السؤال : ترانا نحبك متى تخلي عنك الدوران في ذيك الحواري يا المملوح ابوساره عشان تكتب موضوع عن حاره قديمه ضروره تاخذ لفه في هالحاره وتشوف التغيرات الي صارت فيها .. مثل مدرس جغرافيا عندنا اول يعرفه طرش بحر هذا اذا قالوا لك اهل الخرج مهابيل لا تقول لا ههههههههههه كان يستغل اجازات الصيف ويسافر برا كثير ولمناطق محد يروح لها لكنها مقرره علينا في الكتب .... ويجي بدايةالسنه ويشرح لنا بدون كتاب وكان يقول لاتهمكم الكتب مافيها اي شي من الي شفته في المنطقه الفلانيه انا الحين ماخذ هالمدرس مثى اعلى وصاير قبل اكتب موضوع مثلاً عن شارع الأعشى اروح ادور الأعشى كله واسجل كل ملاحظاتي كنّي من مساحين البلديه ابوساره عن جد اسعدني تواجدك .. واتمنى تكون اجاباتي عليك بحجم تواجدك ياكبير : ) . . . .. ( سديـم ) .. 1 / ماهو سر تسميتك بابونوف ؟ شرحته للكاسر في ردّي على احد اسئلته ... : 2 / ابي رأيك الصريح في اقلاع سابقا والاقلاع حاليا ؟ يمكن ذكرت الكثير من النقاط لأبوساره في ردي عليه ... الفرق بالنسبه لي كبير وكبير مره الاقلاع اول متخصص في الهبال واسمه يوضح هالشي اما الحين خف هالشي بشكل كبير مره بسبب غياب الأسماء الكبيره المتخصصه في هالشي .. وتنوع الاقلاع واصبح منتديات كثيره في منتدى وكثير من الأعضاء وانا منهم الحين اجهل اسماء الكثير من المشرفين والأعضاء لأن الاقلاع اصبح اكبر من ان الواحد يحفظ كل شي فيه مثل اول ... وغابت عنه التلقائيه والبساطه وسيطر عليه الانضباطيه (( بزياده بصراحه )) .. ايه نعم الانضباطيه مطلوبه وفي كل مجال ولكن ياليت يرخون لنا الحبل اشوي مثل اول ... ناخذ مثال اول لو ينزل موضوع ماله داعي او حتى اسم صاحبه مدري كيف صاير كنه نستلمه (( بدون مانغلط اكيد )) ونضحك ونعلق واحياناً نعلق على بعضنا في نفس الموضوع الحين لو ينزل مثل هالموضوع على طول حذف بدون مانبدي راينا فيه : 3 / من من الاعضاء يفتقدهم الاقلاع ؟ كثيرين ... كل الأعضاء القدامى بشكل عام افتقدهم ولكن المنسدح حاله خاصه : 4 / معروف بتميزك بكتاباتك بشكل عام .. وقرينا لك مواضيع ذات طابع جاد وآخر هزلي واقلاعي .. وش الاقرب لنفس رايح فيها من هالاسلوبين ؟ الطابع الهزلي هو الأقرب لي وتقريباً 99% من مواضيعي وحتى ردودي هزليه لأننا ندخل النت للانبساط فإذا كان الواحد جاد في عمله وفي بيته وفي الشارع وحتى في المسنجر احياناً وفي المجتمع بشكل عام وبعد بيكون جاد في النت انصحه اجل لا يدخل ابد .. اوكي احياناً بعض النقاط الجديّه تحتاج للنقاش لكنها بالنسبه لي قليله جداً جداً وحتى الفرجه مااحبها وبدون مبالغه اتوقع لي اكثر من سنه مادخلت منتدى الجاده الا ان كان احد اعطاني رابط دخلت بالصدفه واذا شفت انه من الجاده قفلته بدون مااقراه . حياتنا بشكل عام كلها جاده والدنيا الحين مليانه مشاكل لذلك ليه ازيد من هالأمور حتى عالنت ؟؟ . . . .. ( سرك في بير ) .. 1- من هم اقرب الاعضاء اليك سابقا والان ؟ سابقاً المنسدح .. حالياً الكل قريب ولكن طرش بحر والرهيب وطخ طيخ هم الأقرب . . . .. ( ابو دمجـه ) .. اول شئ بنبدأ بسؤال بسيط .. رايح فيها .. وش قصه بداية حرصك واهتمامك بتاريخ الاقلاع لدرجه انه صار لقبك مؤرخ الاقلاع ... ياليت السوالف بالتفصيل لوسمحت .. يااخي من انسرق ايميلك وانت صاير تعرف تتكلم ههههههههههههههههههههههه تدري ياابودمجه سالفة تاريخ الاقلاع كلها صدفه عن جد ... اتذكر لما كنت ابي اكتب اول موضوع لي في هالمجال كان اسمه حديث الذكريات وكان عام 2000 وقتها كان عندي كم موضوع قديم واقولك كيف جمعتها . تخبر الاتصال اول لك عليه خرابيط بمعنى الكلمه وكل ماشفنا موضوع طويل انا واخوي زاحف كنا نحفظه على اساس نقراه بعدين .. واستمرينا نحفظ المواضيع ونقراها ونرد عليها ومانحذفها موب عشانا نبيها ولكن ننسى نحذفها ... ويوم ان فكرة موضوع حديث الذكريات نزلت براسي حصلت عندي رصيد جيد من المواضيع القديمه والي ساعدني اكثر المايقه الله يذكرها بالخير يوم انها عرفت اني بنزل موضوع تاريخي اعطتني رابط وقالت لي هالرابط فيه الموضوع رقم 7 او8 مااتذكر ولكنه موضوع قديم والسيرفر ذاك الوقت محتفظ بكل المواضيع ... وقتها قمت وشلت الرقم الأخير من الرابط وحطيت رقم واحد وفعلاً ضبط معي وانفتح لي اول موضوع في تاريخ الاقلاع والي كان بعد الافتتاح بربع ساعه تقريباً .. واستمريت على نفس الطريقه وجمعت مواضيع كثيره جداً وكنت اقول في نفسي اتمنى مايكون احد عرف هالطريقه غيري ... وللحين محتفظ فيها على جهاز ثاني خوفاً من ان هالجهاز يخرب فجأه وتروح المواضيع . وبعد ماانسى سي دي جاني هديه من شخص اعتز بمعرفة رجال شرواه وهالسيدي فيه حوالي 500 موضوع قديم وقديم جداً واكثرها لتيزاب خخخخخخخخخخخخخخ وفيه مواضيع بعد اعتقد ان الوقت ماهو مناسب لكتابة حرف واحد عنها واذا ربي عطاني عمر بتشوفون مواضيع والكل بيستغرب من وجودها الى الحين على قيد الحياة : ) : سؤالي الثاني : ماالفرق بين الاقلاع سابقا ...والان ؟! وهل تشعر بالحنين لاقلاع زمان ؟ وهل توافقني ان الاقلاع الان اصبح اكثر ( تكلفا ) .. وأقل بساطه ؟!! انت جاوبت على سؤالك ياابودمجه البساطه الحين اختفت ومثل ماانا قلت في اجابات سابقه على سديم وعلى ابوساره ان الانضباطيه بزياده حلّت محل البساطه ... احياناً اقول ليه صار هالشي واحياناً اقول لازم الانضباطيه لكثرة الأعضاء ماشاء الله ... ولكن لو خيروني بختار اقلاع اول اكيد اكيد اشعر بالحنين لإقلاع اول واسماء اول تدري ياابودمجه الحين العضو ينزل الموضوع ويكون موضوعه هذا يمثله هو فقط عكس اول العضو ينزل موضوع والثاني يكمله ... مازلت اتذكر موضوع نزلته كان الغرض من التشات وفي المنتدى العام وكنا عارفين انه بيروح الماصله لا محاله وفعلاً قلبناه تشات بطريقه هستيريه كنت انا والمنسدح وزاحف اصحاب الفكره وشاركنا غويمض وآهات اعتقد والدباب ومصرقع الخبر وكان التهكم في حنش وعبيد اللوح والسامر ونسيت الرابع بصراحه بس كانوا اربعه واحنا حاطين صورة لأربعه زيود والمنسدح منزل ملف صوتي لفيصل علوي وانواع الهستره : D المهم حنش لحق على الموضوع وعليه تقريباً 40 رد ونقل الموضوع للمميزه بعد ماكنا ننتظر الماصله ... باختصار لو تقرا ذاك الموضوع عن جد ماتدري من كاتبه .. ايه الموضوع بيوزر رايح فيها لكن الردود كانت هي الزبده وقتها .... يعني كنا مكملين لبعض : ) : سؤالي الثالث : وش رايك باللي يتكلمون على هيفاء وهبي ؟ هل تؤيدني اننا لازم نوقف يوزراتهم ؟ ايه يتوقفون ... وعندي حل ثاني تنسرق ايميلاتهم (( ماكني جبتها عالجرح )) : وقبل مااروح سؤال بسيط : لازلت تحبني ؟ ولاغيروك العذال ؟ عجزت احب نصرواي كثل ماحبيتك خصوصاً اني اتمنى اقابلك في البلوت والنصر فايز ببطوله (( ماكني بالغت في الوصف خخخخخخخخخ )) . . . .. ( مـاريا ) .. 1/ وش صار على موضوعك انت وعتاب ؟ ( ما اقصد موضوعك اللي ينكتب... لا يعني سالفتك ) عليكم السلام .. هلا فيك ماريا زميلة الكفاح المسلح .. عن جد تواجد امثالك يحسسني اني فعلاً للحين اكتب في الاقلاع : ) بالنسبه لسالفة عتاب بطلت منها خلاص لأنها طمعانه فيني (( وش عندي يا كوفي عنان )) : 2 / اللاقط الى الحين عندكم ... والا بعتـوه ؟ هههههههههههههههه ماشاء الله عليك .... للحين تمتلكين ذاكره حديديه الله لا يضرك انتي تتذكرين ذاك الموضوع وش كان عنوانه (( آراء الكتـّاب ونظرة الشباب في من الأجمل باسكال او عتاب )) نزلت صورة باسكال في بداية الموضوع وماقصر فيني الشرّي الله يذكره بالخير وقال لي ماله داعي تنزل صور عشان تجذب الناس تقرا موضوعك وكانك صادق ليه ماتنزل صورة باسكال وعتاب ليه باسكال لحالها ؟.. قلت له ياابن الحلال قوقل تعب ماحصل صور لعتاب ههههههههههههههههههههه : 3/ ماذا تعني لك الكلمات التالية : بيالة شاهي / عضو مبدع في الاقلاع الشاورما / وجبه احاول اتحاشاها في الصيف خصوصاً الكمبيوتر / صديقي ومستودع اسراري .. واحياناً انا وهو مانصلح سيارتي / وسيلة نقل (( والله اني قوي : D )) اي زيدي اشوفه / اتذكر زاحف خصوصاً اني ماشفته من كم شهر مع اننا ببيت واحد : 4/ وش معنى صورتك الشخصية.. الارنب اللي فيها وش تقصد به؟؟!! الصوره هذي حصلتها بالصدفه والحين بكل منتدى وبكل مسنجر ووحتى ثيم الجوال حاط هالأرنب .. انا عن نفسي ماادري وش معناها بس اعجبتني وحطيتها ويوم اني سألت اخوي الي حافظها قال هذي احد صور شريط ميتل جير الجديد للحين مانزل وان شاء الله اذا نزل بلعبه لحد مااوصل لهالمرحله واشوفها عالطبيعه .. اما من ناحية وش اقصد فما اقصد شي مجرد ان الصوره اعجبتني وحطيتها : ) : 5 / لو الاقلاع بنت .... تتزوجها ؟ ,,, اذا كانت الاجابة نعم او لا... ليه ؟ مارح اتزوجها ياماريا .. لأن الي يحبونها كثير وانا الغيره مسيطره علي لأني رجل شرقي (( يعني ساكن في الشرقيه )) : 6 / متى يجي الوقت اللي توقف فيه كتابة في الاقلاع؟؟ وتقول خلاص... اكتفيت ؟ من اول حرف كتبته في الاقلاع وانا اسأل نفسي هالسؤال عجزت احصل له اجابه هالشي يجي من نفسه والله اعلم متى يجي ... انا لو علي اتمنى تكون حروفي هذي آخر مااكتب في الاقلاع ولكن هالشي ماهو بكيفي .. اتمنى يكون هالشي قريب جداً ان شاء الله ولو اني مااتوقع يصير هالشي حالياً !! . . . .. ( يورانيم ) .. س1 / كم عمرك من جابتني امي للحين .. احسبها انت : س2 / متزوج و كم لا .. اعزب لحد دلوئتي : س3 / وش موترك (اذا كان كرسيدا يحذف السؤال ) سبقت الاجابه على السؤال اعلاه : س4 / تحب النصر احب كل شي حلو بالدنيا .. اذا النصر حلو مافيه مانع احبه @@ : س5 / وش أول مشاركة لك بالإقلاع المشاركة رقم 1 اول مشاركه لي كانت رد على موضوع لقابعها يوم ان الجن يخطفونه وينزلونه تحت الأرض ... وكانت بعد تسجيلي بيوزر رايح فيها بيوم واحد ... وهذي صورة ارشيفيه لنفس المشاركه ...  . .
|