عاد هذا شي ثاني
اي بنت بذاك الوقت ماكانت تخق على سعود الدوسري تراها يا اما حولا ولا فيها عين وصارت ماتميز بين الحق والباطل
يعني كان من اهم مايميز فترة التسعينات ان جميع البنات بلا استثناء خاقات مع الاخ سعود
كان مذيع بالـ mbc fm ويقدم برنامج ليلة خميس
سبحان الله كان مذيع بالراديو شلون اكتشفوا وجهه مادري !
يعني لو بالتلفزيون كان نقول شافوا وجهه بس واحد متغبي بلندن ويجي من وراء المايك شلون نفشتن عنه ؟!
تخيلوا وحده اعرفها .. عندها اغلب صور الاخ سعود
اهم شي انه دفتر ملصقه فيه صور سعود بالترتيب
وفيه صور نادره له وصور من جوازه واسم امه < صجتنا انها تعرف اسمه تقل تبي تعرس عليه
كانوا البنات يشترون جريدة الجزيره بس عشان الملحق الفني اللي فيها كانوا يجيبون طاري سعود
وبذاك الوقت بعد طلعت مجلة فواصل وصاروا اذكياء بكل عدد يجيبون طاريه
والبنات هات يا مجله انواع تنظيف الرفوف ..
والمجله يحسبون الناس تشتري المجلات الشعبيه عشان خاطر الشعر مادروا ان مراهقاتنا القديمات خاقات للنعله مع الاخ سعود
كانت صوره قليله ذاك الوقت يعني مالهم مصدر صور الا المجلات او الجرايد مو زي الحين نت وقوقل تقدرين تطلعين وجهه وهو يفلي قذلته
واشتهر سعود بذاك الوقت بالبدله الموف اللي كان لابسها وحاط يده على راسه
ودي سعود بس يقرا الموضوع ويجيب لنا صورة البدله عشان نتاكد منها < على ذمة بنت عمتي ترى
سعود اول غير سعود الحين
الحين صار دب وخلاص راحت طفته .. يعني فيه سعوديين مماليح غيره .. طلع ياسر وخرب سوق الشعب
اول ماكان فيه الا هو ! وجا بطريقه متاحه لأغلب البنات يعني مايحتاج دش عشان تشوفه
كان يجي عن طريق الراديو اسهل من كذا ايه ! كل وحده تقول بسمع اذاعة القران وهي حاطه على سعود واحمد الحامد












طبعاً اللي ماخقت على سعود يمديها تخق على الاخ اللطيف هذا
هذا خالد التيماوي .. لاعب نادي الهلال السابق
ثلاث ارباع بنات السعوديه هلاليات ..وشي اكيد السبب هو حسن الخلق
يعني خالد التيماوي اول زي يسوري الحين
سبحان الله هالهلال حالف كل جيل يطلع لنا واحد اطخم
اول كانوا البنات يتابعن كوره عشان بس يهف بغرته كذا ويسوي حركه عاصفه
يعني بنات النصر اول يكشخن بـ فهد الهريفي بس فهد الهريفي اختفى ماصار له حس زي خلودي
يعني بساحة المدرسه يجون البنات واقفات معهن ببسي وكتكات وكل وحده تقول فريقنا احسن من فريقكم
وش جاب التيماوي للهريفي ومن يومها بنات النصر مضطهدات
يعني لابطولات ولا لاعبين حلوين .. الله يصبركن بس
















كان الاعلام الفني سابقاً يعتمد على الجرايد وعلى برنامج ليلة خميس ومايطلبه المشاهدون على قناة السعوديه
ما كان فيه حريه ولا ابداع .. مالك حل الا تشوفين وانتي منطمه وساكته واحمدي ربك ان جابوا لك شي
كل هذا الكبت تبدد يوم طلعت مجلة فواصل
هذي المجله كانت بمثابة النور الذي اضاء العتمه اللي كاتمه على قلوب مراهقتنا لبى قلوبهن
كانت شي جديد ومتميزه بالاخراج والاوان والصور
وتجيب شعراء طخوم واهم شي طلال الرشيد الله يرحمه كان يكتب بكل بداية عدد
كان هذا تغيير مذهل .. بناتنا تغيرت نظرتهم للامور وصارن يخقن على سنع
ذاك الوقت ماكان فيه ايميل يسهل التواصل .. كان فيه ( ص . ب ) كثر خيره
مجلة فواصل كانت الاكثر مبيعاً نظرا لتميزها في عرض الشعر اللي خقق بناتنا
وصور الاطفال اللي كانوا يحطونها .. استاثموا فيهن ياحولي
كان مافيه حرية ولا ابداع و جوا فتحوا لهن الباب على مصراعيه












كل بنت لها حياة خاصه يعني تحوم كبدها وتتضايق
ولا تتهاوش مع المراقبه بالمدرسه عشان المريول ضيق
ولا متكحله زياده عن اللزوم ..
تجي تحط حرتها بالهضعيف .. انه خالد عبدالرحمن
مخاوي الليل .. ابو صوت حزين واغاني خاثره
اغاني خالد عبد الرحمن شكلت ثقافه معينه بين بنات ذاك الجيل
ان الحب = حزن .. وكآبه .. ومسجل احمر تتوسدينه قبل تنامين
من اكثر اغانيه المشهوره .. انتظرته .. خبروه .. العطا ..حالمه .. زليت ..آهات .. بقايا جروح .. و الخ الخ من الاغاني الحزينه الهاديه
كان خالد عبدالرحمن الفنان الاول للمراهقات العاشقات يكتبون اغانيه ويحفظونها صم اكثر من مادة النصوص









لا تخلو منه شنطة اي مراهكه
تعرفون لازم علك ابو ****
عشان يعطر رائحة الفم وينعش الخشه اللي فيها محدد بني






خلونا نسيّر على مراهقتين سابقتين
نشوف كيف كانت مراهقتهم هذا اذا كانن يدرن وش معنى هالكلمة
من قال سيره ؟!
 

سيره الحب ..

هذي مذكراتي .. اهداء لكم مجاني
<< ترفقي يا نبيلة عبيد
لا بس مهيب بعيدة مع عصر الطفرة
انزلها باتسر ابيعها في ابو ريالين ..
ولا انتشر الكتاب زدت السعر 5%
المفروض احتسي عن المذكرات كنها شي ماضي
مع اني لين يومكم مراهقة مع سبق الاصرار والترصد
انتقلت من مرحلة الطفولة للمراهقة تدريجيا
اول كنت ألعب مع عيال الحارة كورة في حوشنا
بعدين صرت مشجعه بس أجيب دبة الغاز و اتكي فوقها واشجعهم ..
وان جاء اي واحد اصابة يلعبوني خمس دقايق بس
عقبها انتقلت للمرحلة الثانية ..
صرت اتابعهم مع دريشة المقلط
واتحمممممس ولاجاب احد قول اراكض للصالة
اسوي حركة ببيتو وارجع اتابع
عقبها تركت الاولاد .. وبديت ادخل مجتمع البنات
اشييييييييييييييين شي هالمرحلة .. لانيب كبيرة ولا بزر
لا واغبى شي اني اتغطى عن اللي في الشارع
وعند اقاربنا مابعد تغطيت عنهم
صرت نجتمع انا وصديقاتي كل ربوع وخميس
و لازم الاربعاء نسجل سفينة نوح
هذا برنامج كان يجي على المستقبل فيه شباب وبنات
كان ( ستار اكاديمي ) ذاك الوقت .. وه بس ياغريتا
المهم ونردح معهم ونعيش جو ..
الفترة العنيفة في مراهقتي الردح ..
تعرفون خاله مااستغني عن الطيران والطقطقة والاستنزال
بس مسكت معي مسكة غبيييييية
صرت اردح اجبني ..
عاد مابزيت عمري في رقص المسلمين اروح اردح ردحة الكافرين
كان على ايام فايف وباك ستريت وكريستينا وبرتني
على اني مااوطن برتني هالحين بس اول ماطلعت مسويتن جو
كنا نتردح على اغنيتها ون مور تايم تساني منيب ملخبطه في الاسم
ولا باك كل وحده من الشلة متقمصة شخصية واحد
اللي حالتن اي جي واللي نيك واللي كيفن
واللي براين واللي هاواي
ونلبس ابيض و نغني اي واااااااانيييييييييت ذات واي
المشكلة خششنا تعطينا نغني لميااااامي ويخب
حركات التمكيج والتميلح ..
الحمد لله ماطحت فيها .. مع اني يومي بزر
كان ينقطع قلبي على الروج البني الفحمه
ههههههههههه الله يذكر احلاموه بالخير
وياما تسحبت لغرفة امي ولطيت من هالروج
اهم شي معاملة الاهل مع المراهقين .. خاصتن الام
ياحبني لها امي ماعندها مشكله .. تقول فترة وبتعقلين وهي صادزه ..
اما اختي الكبيرة كانت معي في نفس الغرفة ..
ومصادقتني وتسذا بس مرة سوت حركة غبية يعنني حريصة
كانت بتطلع تمرح عند خالتي مدري عماني ..
المهم كان في غرفتنا رسيفير ودايم لاراحت عادي الوضع
بس هالمرة يقالها اني مراهقة وفي المتوسط
وقامت معطت اسلاكه ووزته في دولابها
عاد قعدت احلل في مخي المخيس وطلعت بالناتج
ان اختي ما شالته الا انها خايفتن اشوف شي شين
معناها اني الحين لازم اشوف شي شين
والله واطلع الرسيفر ويلعب الشيطان في راسي
واقعد اناظر فيلم ابيض واسود لنادية لطفي جعلها الضربه
قلت شي شين بس موب عاد تفلها
على ان التلفزيون يلعب دور ..
الله من مرة حلمت اني ضعت او ان اهلي طلعوا بالغلط
ثمن اصير شغاله عند ناس واحب ولدهم << كاسندرا بالسعودي

نجي للدفاتر والاتوجرافات ..
مدري وش سنع هالخرابيط بس تقولين محلفون عليتس
ماتصيرين مراهقة طبيعية الا وعندتس دفتر
وهات ياتشقيق من المجلات وتلزيق وزربرقه
صور سعود بن عبدالله سعود الدوسري
التيماوي التمياط اي خشة زينة ماتنتفوت
وهات يااشعار جنبها ههههههههههههههههههههههه
تفيض القريحه عند هالخشش

وهذا ماضيي الاسود الشنيع
صفحات حياتي كلها بين يدينكم << لايكثر

 

 

 

 

المتبودره ..

( مذكرات 1930قبل الميلاد )


طبعا"انا مراهقتي بدت بدري لاني كنت طفله بجسم حرمه
عمري كان 10سنين بس اللي يشوفني يتوقع ان توني طالعه من النفاس
بذات اني سمينه وشعري كاريه
كانت امي تحرج علي لين اجتمعت في مقدمت البيت الضحويه مع حريم الجيران
بحلت بي لا انا اللي بزر ولا انااللي حرمه قالت مالها الاتزوجني وتفتك

كنت كل يوم الساعه خمس الفجر لين سمعت صوت البلديه مارين اركض افتح الباب اتفرج عليهم
استانس لين شفت الهندي متعلق من ورى سيارة الزباله وفجأه ينط كنت اتمنى اتزوج بطل مثله
ماقد عمري شفت واحد ينط الا هو وهذي متطلبات الرجوله في نظر عيوني الصغار
المهم اقعد عند الباب لين عيلان جيرانا يبدون يطلعون للشارع واحد ورى الثاني يستغربون لين
شافوا حرمه عند الباب
وبدل مايروحون يجيبون فول وخبز يقعدون يرجموني من بعيد هذي حركات
الرومنصيه حقتهم يعني تراس حلوه
انا عاد ابدا ارد الباب وافتحه واطلع مره اترزز ومره اطل من ورى الباب يقالي مستحيه
بس سبحان الله كان تفكيري بس اني اترزز ماقد فكرت اكد شعري ولا البس فستان زين
ابد اقحص من مرقدي وانا شعري ممعوط وفستاني من امس علي والحزام منفك وافتح الباب وبس
ومع ذلك كنت فاتنة شارعنا
الايوم جتني بنت خالتي وكانت اكبر مني باربع سنوات و ملكعه قوه وشايفتن عمرهابس يحقلها
ابوها غني وماقد جونا الا ومعها ريالات وشاريه كاكويات
وتغايرني فيها واحناوقتها ضعوف والمتعه الوحيده
اللي عندنا لين جانا احد رقينا السطح نلعب مع الخرفان ولانرجم بيض على بيت ابوخالد اللي جنبنا
الموهيم نرجع للسيره الذاتيه لبنت خالتي كنت اتمنى اصير مثلها كانت
حلوه مره وعصلا وغنيه واول من شرا ازنوبيل
ابوها ودايم اذا جتنا تقعد تعلمني وشلون عيلان الجيران متسدحين عليها وكل يوم يكتب لها واحد رساله
واللي كاتب احبس على جدار بيتهم عاد انا كنت شوي متنحه ومااعرف اسوي حركات مثلها وانزل قصه على قدام
والبس صندل بس هي كانت هاي هاي مشالله عليها
عاد قمت انا وعلمتها ان فيه واحد في حارتنا معجبني مره وانه هو الوحيد اللي داخل قلبي وودي اعرس عليه واسمه ناصر
ولد ام ناصر البدويه
قالت لي لين شفتيه ترززي له ولا اشري له وسوي مثلي وعطيه كاكاو ولا قولي له يجيب لس عصير غوار
وقالت لين جا في الليل فكي شعرتس وافسخي الفستان عشان مايتعفط ولين جا الصبح البسيه مرتن اخرى
عاد المشكله امي تربط شعري بمغاط اسود تلويه تلويه لين تطلع عيوني من مكانها وش بيفكه بس قلت بسوي اللي قالته بنت خالتي
وبتوكل على الله
يوم جا بين العشاوين قلت لاختي فكي شعري جابت سكين وقطعت المغاط وحسيت ان مخي رجع لي
امي الله يهديها ربطت افكاري من قوة حزمها لشعري
قبل ارقد مرخت راسي بكريم ابوورده وفسخت فستاني ابونقشه زري ورقدت وانااحلم
بناصر وكل حلمي اني اعرست واطبخ له غدا العن البراءه
يوم جا الفجر واسمع صوت الزباله واقحص والبس فستاني بس خساره نسيت اربط الحزام
وازين شعري بالمشط الاسود وعاد لينه لازق من الكريم يوم فتحت الباب زي العاده
واغض النظر عن معجبيني كلهم واصبر الين يوم شفت ناصر مقبل
يوم شفته مار من عند باب بيتنا واجي انزل من عند زلفت باب بيتنا وانا متبوسمه واخبط على وجهي واطيح ذيك الطيحه
وارتاع ناصر بس تسنه ماشافني راح يمشي وكني اشوفه اسرع الخواف بعد
وتجي امي على صياحي عند الباب يوم شافتني ساجده على وجهي وتشدني مع يدي واناخشمي يرعف
وتدحجني على ظهري تسحبني وتدحج تسحبني وتدحج وهي تقولي بكل حنان وش مطلعس للشارع
يالفاهر ياقليلة السمت (للحين ماعرفت معناتها) ياملعونة الصير ويجي ابوي ويجلدني معها واصيح واغشى من الصياح
عاد اليوم الثاني يوم قمت حسيت اني ماش ماعاد ابي ناصر من عقب ماطحت قدامه تفشلت مرره منه ونسيته مرره
عاد بعد كم سنه كبرت شوي وضعفت اشوى طلعنا من حينا وسكنا واحدن ثاني
وجت بنت خالتي مرتن اخرى وقعدت تعلمني عن ولد جيرانهم اللي يحبها ويدق على تليفونبيتهم ولين ردت سكر في وجهها وترجع هي تدق على تليفون بيت ولد جيرانهم ولين رد سكرت في وجهه
وانا اقعد افتح فمي واحسدها يحظها مستانسه وتقعد بنت خالتي تقولي عن جمالها ووشلون عيلان حارتهم
وعيال عمانها منهبلين عليها وانااقعد اقولها يحظس متى اصير مثل جمالس وتقولي مافي امل
رحنا اناوبنت خالتي واخواني واخوها للحديقه اللي جنب بيتنا
عاد هي كانت تلبس عبايه وتتغطى وانامثلها لاني جرمه (حجمي كبير ) يوم رحنا الحديقه ومالقينافيها احد
ونذب بشوتنا ونقعد نتمرجح ويجي ولد يهبببببل شكله من عيال حارتنا وقعد يلعب مع اخواني وولد خالتي
ودريت ان اسمه محمد
ونقعد نناظره من بعيد وتقولي بنت خالتي شفتي شلون يناظرني قلت ايه لانس حلوه
واقعد اناوياها نتمرجح بقوه يعني شفناناظرنا ترانا نعرف نطير في السما
وكل مازاد الهوا طلعت سيقاني نحاف وشهب بس ماكنت ادقق
اهم شي الفت انتباهه مثل ماعلمتني بنت خالتي
راحوا بنت خالتي لبيتهم بس محمد ساكن حارتنا يعني مكتوب لي باذن الله
صادق اخواني وصرت دايم اشوفه يجي بيتنا ويقعد يقشم حب هو واخواني عند باب بيتنا وهم مبوبزين
ويشربون ارسي كولا ولاتيم
بس كان لسانه طويل ويحب يحارشني لين شافني
ويحب يلاغيني ويفشلني ويذب علي
بس عاد شسوي الزين مايكمل اطخم الولد مره عشان تسذا شايف عميرته
وراحت الايام والسنوات وانا افتح له الباب ويقولي نادي اخوس يالقزما
نادي اخوس يالشيفه
نادي اخوس يالكوره
نادي اخوس يالطويله الهبيله
فقدت الامل اني اصير جميله مثل بنت خالتي ولا اني القى واحد يحبني مثلها لاني شيفه ومحد يبيني

.
.

2008

كبرت<<< لاياشيخه
الاكتشافات اللي اكتشفتها
بنت خالتي قصيره وشينه ومازالت تألف افلام وقصص بس ماعاد تقدر تنصب وتقول انها حلوه لاني كبرت مايمديهاتنصب علي وتتخيل
ناصر ولد جيرانا الاول متزوج من وحده تقرب لنا وكل ماشفتها تجيني ضحكه
محمد ولد جيرانا ( الاطخم ) شييين مررره وقصير عشان تسذا
كان يلاغيني منقهر من طولي.. متزوج ومن فتره يلمح لاخوي يبي ياخذني مسيار
مراهقتي كانت بريئه وكل رجال كان بالنسبه لي زوجي واتخيله يقول حطي الغداء ياهيش